മലയാളത്തില്‍ ദിനം പ്രതി നൂറുകണക്കിന് പോസ്റ്റുകളാണ് ഉണ്ടായിക്കൊണ്ടിരിക്കൂന്നത്. ഇവയെല്ലാം ഒന്നോടിച്ചു നോക്കി താത്പര്യമുള്ളവ കണ്ടെത്തുക എന്നത് ആയാസകരമായ ഒരു പ്രവൃത്തിയാണ്. നമുക്ക് താത്പര്യമുള്ളവരുടെ ബ്ലോഗുകള്‍ റീഡറില്‍ സബ്സ്ക്രൈബ് ചെയ്യാം, എന്നാല്‍ നമ്മുടെ സബ്‌സ്ക്രിപ്ഷനില്‍ വരാത്ത ഒരാളുടെ ഒരു നല്ല പോസ്റ്റ് ചിലപ്പോള്‍ വിട്ടുപോയി എന്നു വരാം. പിന്മൊഴി/മറുമൊഴി എന്നിവ പരിശോധിച്ചാല്‍ ഏറ്റവും കൂടുതല്‍ കമന്റ് വീണ പോസ്റ്റുകള്‍ നമുക്ക് ലഭ്യമാവും. എന്നാല്‍, പലപ്പോഴും കമന്റുകള്‍ വാരിക്കൂട്ടുക നല്ല പോസ്റ്റുകള്‍ തന്നെയാ‍വണമെന്നില്ല. ഇവിടെയാണ് ഷെയേഡ് ലിസ്റ്റുകളുടെ പ്രസക്തി.

എന്താണ് ഷെയേഡ് ലിസ്റ്റുകള്‍?
സ്വന്തമായി പൈപ്പുണ്ടാക്കാം എന്ന പോസ്റ്റില്‍ ഗൂഗിള്‍ റീഡറിനെക്കുറിച്ചും അതിന്റെ ഉപയോഗത്തെക്കുറിച്ചും പറഞ്ഞിരുന്നുവല്ലോ? ഗൂഗിള്‍ റീഡറിന്റെ വിവിധ സാധ്യതകളില്‍ ഒന്നാണ് ഷെയേഡ് ലിസ്റ്റുകള്‍. ഓരോ ഫീഡ് ഐറ്റവും ഗൂഗിള്‍ റീഡറില്‍ ദൃശ്യമാക്കുമ്പോള്‍ അതിനു താഴെയായി കുറച്ച് ഓപ്ഷനുകളും ലഭ്യമാണ്. Add Star, Share, Email, Mark as read, Add tags എന്നിവയാണവ. താഴെക്കാണുന്ന ചിത്രം ശ്രദ്ധിക്കുക.

സൂചന: ചിത്രത്തില്‍ മൌസമര്‍ത്തിയാല്‍ പൂര്‍ണ്ണരൂപത്തില്‍ പുതിയ വിന്‍ഡോയില്‍ കാണാവുന്നതാണ്.

ചിത്രത്തില്‍ ഇ-ഗവേണന്‍സ് എന്ന ഫീഡ് ഐറ്റം ഹൈലൈറ്റ് ചെയ്തിരിക്കുന്നു. പ്രസ്തുത പോസ്റ്റ് നിങ്ങള്‍ വായിക്കുന്നു എന്നിരിക്കട്ടെ. വായിച്ചതിനു ശേഷം നിങ്ങള്‍ക്കു തോന്നുകയാണ്; ഇത് നല്ല ഒരു ലേഖനമാണ്, മറ്റുള്ളവരും ഇത് വായിച്ചിരിക്കേണ്ടതാണ് എന്നൊക്കെ, അപ്പോള്‍ അതിന്റെ ചുവട്ടില്‍ കാണുന്ന Share എന്ന ഓപ്ഷനില്‍ ക്ലിക്ക് ചെയ്ത് ആ പോസ്റ്റ് മറ്റുള്ളവരുമായി ഷെയ‌ര്‍ ചെയ്യാവുന്നതാണ്. ഷെയര്‍ ചെയ്തു കഴിയുമ്പോള്‍ ആ ഓപ്ഷന്‍ Unshare എന്നു ദൃശ്യമാക്കും. പിന്നീട് ആ ലേഖനത്തേക്കാള്‍ മികച്ച മറ്റൊന്ന് അതേ വിഷയത്തില്‍ വന്നു എങ്കില്‍, ഇത് ഷെയേഡ് ലിസ്റ്റില്‍ നിന്നും ഒഴിവാക്കാവുന്നതാണ്. അതല്ലാതെ, ഒരാഴ്ചയ്ക്കു ശേഷം എല്ലാം അണ്‍ഷെയര്‍ ചെയ്ത് പുതിയ കുറേയെണ്ണം ഷെയര്‍ ചെയ്യുക എന്ന രീതി പിന്തുടരേണ്ടതില്ല, അത് ഈ സാധ്യതയുടെ പ്രയോജനം കുറയ്ക്കുകയും ചെയ്യും.

ഈ രീതിയില്‍ ഷെയര്‍ ചെയ്ത പോസ്റ്റുകളെല്ലാം Shared items എന്ന ലിങ്കില്‍ (ഇടതുഭാഗത്ത് മുകളിലായി) ലഭ്യമാണ്. ആ ലിങ്കില്‍, ഫീഡ് പ്രിവ്യൂ പാനലിലായി നിങ്ങളുടെ ഷെയേഡ് ലിസ്റ്റ് പേജും ഫീഡ് ലിങ്കും ലഭ്യമായിരിക്കും. ഈ ഷെയേഡ് ലിസ്റ്റ് ഇ-മെയിലായി സുഹൃത്തുക്കള്‍ക്കയച്ചു കൊടുക്കാം, അല്ലെങ്കില്‍ നിങ്ങളുടെ ബ്ലോഗില്‍ ഒരു വിഡ്ജറ്റായി ചേര്‍ക്കാം അതുമല്ലെങ്കില്‍, നിങ്ങളുടെ ഒരു ലിങ്കായി മറ്റു പലസ്ഥലങ്ങളിലും (ഉദാ: ഓര്‍ക്കുട്ട്) ഈ ഷെയേഡ് ലിസ്റ്റ് ലിങ്ക് നല്‍കാം. താഴെക്കാ‍ണുന്ന ചിത്രം ശ്രദ്ധിക്കുക.

സൂചന: ചിത്രത്തില്‍ മൌസമര്‍ത്തിയാല്‍ പൂര്‍ണ്ണരൂപത്തില്‍ പുതിയ വിന്‍ഡോയില്‍ കാണാവുന്നതാണ്.

ഷെയേഡ് ലിസ്റ്റുകള്‍ എങ്ങിനെ പ്രയോജനപ്പെടുത്താം?
ഷെയേഡ് ലിസ്റ്റുകള്‍ മറ്റു പലരീതിയിലും പ്രയോജനപ്പെടുത്തുവാനാവും. അതിലൊരു രീതിയാണ് ചെറുവക എന്ന ബ്ലോഗില്‍, ബ്ലോഗ് ഡൈജസ്റ്റിലേക്കുള്ള രചനകള്‍ എന്ന പോസ്റ്റില്‍ സിബു വിശദമാക്കിയിരിക്കുന്നത്. പലരുടേയും ഷെയേഡ് ലിസ്റ്റുകള്‍ ഒരു പൈപ്പ് ഉപയോഗിച്ച് സമാഹരിച്ച്, അവയില്‍ ഏറ്റവും കൂടുതല്‍ പേര്‍ നിര്‍ദേശിച്ച പോസ്റ്റുകള്‍ ഒരു ഡൈജസ്റ്റായി പ്രസിദ്ധപ്പെടുത്തുന്നു. ഇപ്പോള്‍ ലഭ്യമായ ഷെയേഡ് ലിസ്റ്റുകള്‍ വരമൊഴി-വിക്കിയുടെ ഈ പേജില്‍ ലഭ്യമാ‍ണ്.

എന്നാല്‍ ഈ രീതിയില്‍ ഒരു ഡൈജസ്റ്റ് വിജയിപ്പിക്കുവാന്‍‍, വളരെക്കുറച്ചു പേരുടെ ഷെയേഡ് ലിസ്റ്റുകള്‍ മാത്രം ഉപയോഗിച്ച് സാധ്യമാവില്ല. ബ്ലോഗുകള്‍ സ്ഥിരമായി വായിക്കുന്ന, ഗൂഗിള്‍ റീഡര്‍ ഉപയോഗിക്കുന്ന ഏതൊരാള്‍ക്കും ഈ ഉദ്യമത്തില്‍ പങ്കാളികളാകാം. ഇതില്‍ പങ്കാളികളാകുവാന്‍ ഇത്രയും കാ‍ര്യങ്ങള്‍ ചെയ്താല്‍ മതിയാവും:
• ഗൂഗിള്‍ റീഡറില്‍ ലോഗ്-ഇന്‍ ചെയ്യുക. നിങ്ങള്‍ക്കു പ്രീയപ്പെട്ട ബ്ലോഗുകള്‍ Add Subscription ലിങ്ക് ഉപയോഗിച്ച് സബ്‌സ്ക്രൈബ് ചെയ്യുക. മലയാളം ബ്ലോഗുകളില്‍ പുതുതായി വരുന്ന പോസ്റ്റുകള്‍ ലിസ്റ്റ് ചെയ്യുന്ന ഈ പൈപ്പും സബ്‌സ്ക്രൈബ് ചെയ്യുന്നത് നന്നായിരിക്കും.
• നിങ്ങള്‍ വായിക്കുന്ന പോസ്റ്റുകളില്‍ മറ്റുള്ളവരും കാണണം എന്ന് നിങ്ങള്‍ ആഗ്രഹിക്കുന്ന പോസ്റ്റുകള്‍, അതാത് ഫീഡ്-ഐറ്റത്തിലെ Share ഓപ്ഷന്‍ ഉപയോഗിച്ച് ഷെയര്‍ ചെയ്യുക.
• മുകളില്‍ കാണുന്ന ചിത്രത്തില്‍ കാണുന്നതുപോലെ; ഗൂഗിള്‍ റീഡറില്‍ Shared items എന്ന ലിങ്കില്‍ പൊയി, നിങ്ങളുടെ ലിസ്റ്റിന്റെ യു.ആര്‍.എല്‍ അല്ലെങ്കില്‍ ഫീഡ് യു.ആര്‍.എല്‍ കോപ്പി ചെയ്ത്, ഇവിടെ ഒരു കമന്റായി ചേര്‍ക്കുക. അവ വരമൊഴി വിക്കി പേജിലും, ഡൈജസ്റ്റിലേക്ക് പോസ്റ്റുകള്‍ തിരഞ്ഞെടുക്കുവാനുള്ള പൈപ്പിലും ഉപയോഗിക്കുന്നതാണ്.(ഈ കാര്യത്തില്‍ തീരുമാനമെടുക്കുവാനുള്ള പരിപൂര്‍ണ്ണ സ്വാതന്ത്ര്യം ഡൈജസ്റ്റിന്റെ പിന്നണി പ്രവര്‍ത്തകരിലും സിബുവിലും മാത്രം നിക്ഷിപ്തമാണ്.) ബ്ലോഗ് ഡൈജസ്റ്റിലേക്ക് തിരഞ്ഞെടുക്കുന്ന പോസ്റ്റുകള് സിബുവിന്റെ ഈ പൈപ്പില്‍ ലഭ്യമാണ്.

ശ്രദ്ധിക്കുക:
• ഷെയേഡ് ലിസ്റ്റ് ലിങ്ക് അല്ലെങ്കില്‍ ഷെയേഡ് ലിസ്റ്റ് ഫീഡ് ലിങ്ക് ഇവിടെ കമന്റായി നല്‍കുമ്പോള്‍ അതൊരു ഹൈപ്പര്‍ ലിങ്കായി നല്‍കുവാന്‍ താത്പര്യപ്പെടുന്നു. എങ്ങിനെ ഹൈപ്പര്‍ ലിങ്കായി നല്‍കാം എന്നത് ഇവിടെ വിശദമാക്കിയിട്ടുണ്ട്.
• അവരവരുടെ തന്നെ ബ്ലോഗ് പോസ്റ്റുകള്‍ ഷെയര്‍ ചെയ്യാതെയിരിക്കുക.
• ഒന്നില്‍ കൂടുതല്‍ ഫീഡില്‍ ഒരു പോസ്റ്റ് തന്നെ ഷെയര്‍ ചെയ്യാതിരിക്കുക. (ഉദാ: ഒരു ബ്ലോഗ് നിങ്ങള്‍ സബ്സ്ക്രൈബ് ചെയ്തിട്ടുണ്ടെങ്കില്‍, അത് ആ സബ്സ്ക്രിപ്ഷനിലെ ഫീഡ് ഐറ്റമായും, മലയാളം ബ്ലോഗ് പോസ്റ്റുകള്‍ എന്ന പൈപ്പിലെ ഫീഡ് ഐറ്റമായും റീഡറില്‍ കാണപ്പെടും. രണ്ടു പോസ്റ്റും ഒരു സമയം ഷെയര്‍ ചെയ്യേണ്ടതില്ല.)
• വ്യക്തിബന്ധങ്ങളും ഷെയേഡ് ലിസ്റ്റുകളുമായി കൂട്ടിക്കുഴയ്ക്കാതിരിക്കുക. (ബ്ലോഗുകള്‍ എഴുതുന്നവര്‍ക്കും വായനക്കാര്‍ക്കും ഇതു ബാധകമാണ്.)

ഏവരുടേയും സഹകരണം പ്രതീക്ഷിക്കുന്നു.

ഇപ്പോള്‍ ലഭ്യമായ ഷെയേഡ് ലിസ്റ്റുകള്‍:
(ജൂണ്‍ 29, 2007 വരെ)
• ആഷ • ഇഞ്ചിപ്പെണ്ണ് • തമനു • ദേവരാഗം • ഡാലി • പെരുങ്ങോടന്‍‍ • പൊന്നപ്പന്‍ • പ്രമോദ് • ബിന്ദു • രാജേഷ് വര്‍മ്മ • വിഷ്ണു • ശ്രീജ • സാജന്‍ • സിദ്ധാര്‍ത്ഥന്‍ • സിബു • രാധേയന്‍ • ഹരീ • ഇടങ്ങള്‍ • ഉമേഷ് • കല്യാണി • കെവിന്‍ • കേരള ഫാര്‍മര്‍ • സന്തോഷ് • രേഷ്മ • വേണു

(ജൂലൈ 09, 2007 വരെ)
• പരാജിതന്‍ • ഏവൂരാന്‍ • വെമ്പള്ളി • കണ്ണൂസ് • പ്രതിഭ • സാല്‍ജോ • സന്ദീപ് • ഇബ്രു • ഡാന്റിസ് • തുളസി

Post a Comment

Keywords: Pipe, Aggregater, Varamozhi Magazine, Blog Digest, Selected Posts, Shared Items, Google Reader, How to share blog posts
--

മലയാളത്തില്‍ ബ്ലോഗ് ചെയ്യുന്നവര്‍ക്ക് സഹായകമായേക്കാവുന്ന അഞ്ചു നുറുങ്ങുകളാണ് ഇവിടെ പരിചയപ്പെടുത്തുന്നത്. ഐ.ഇ-യിലേതു പോലെ, ഫയര്‍ ഫോക്സിലും എങ്ങിനെ ബ്ലോഗ് പോസ്റ്റിലെ ചില്ലക്ഷരങ്ങള്‍ ശരിയായി ദൃശ്യമാക്കാം; കമന്റ് ചെയ്യുമ്പോള്‍ എങ്ങിനെ ഹൈപ്പര്‍ ലിങ്ക്, ഇറ്റാലിക്സ്, ബോള്‍ഡ് ടെക്സ്റ്റ് എന്നിവ ഉപയോഗിക്കാം; ചിത്രങ്ങള്‍ എങ്ങിനെ ചെറുതാക്കി നല്‍കി, പുതിയ ജാലകത്തില്‍ വലുതായി തുറക്കാം; അനോണികമന്റുകള്‍ എങ്ങിനെ ഒഴിവാക്കാം; ഓര്‍ക്കുട്ടില്‍ ബ്ലോഗുകള്‍ എങ്ങിനെ ചേര്‍ക്കാം എന്നീ കാര്യങ്ങളെക്കുറിച്ചാണ് ഇവിടെ പ്രതിപാദിക്കുന്നത്.

1. ഫയര്‍ഫോക്സും ചില്ലക്ഷരങ്ങളും
ഫയര്‍ഫോക്സില്‍ മലയാളം യൂണിക്കോഡ് ടെക്സ്റ്റിലെ ചില്ലക്ഷരങ്ങള്‍ ശരിയായി ദൃശ്യമാവാറില്ല. മറ്റു ചില അക്ഷരങ്ങള്‍ക്കും പ്രശ്നങ്ങളുണ്ട്. എന്നാല്‍ മലയാളത്തില്‍ ബ്ലോഗ് ചെയ്യുമ്പോള്‍ ഫയര്‍ഫോക്സിലും ചില്ലക്ഷരങ്ങള്‍ ശരിയായി ദൃശ്യമാവുന്ന രീതിയില്‍ സെറ്റ് ചെയ്യുവാന്‍ കഴിയും. എങ്ങിനെയാണത് സാധ്യമാവുക? ബ്ലോഗറില്‍ നമുക്ക് ഇഷ്ടമുള്ള ഫോണ്ട് ഉപയോഗിച്ച് കണ്ടന്റ് ദൃശ്യമാക്കുവാന്‍ സാധിക്കും. span എന്ന ടാഗ് ഉപയോഗിച്ചാണ് അത് സാധ്യമാ‍വുക. എന്നാല്‍ ബ്ലോഗര്‍ എഡിറ്റ് വിന്‍ഡോയില്‍ ഫോണ്ട് സെലക്ഷനില്‍ സിസ്റ്റം ഡിഫോള്‍ട്ട് ഫോണ്ടുകള്‍ മാത്രമേ ലഭ്യമായിരിക്കുകയുള്ളൂ. അതിനാല്‍ Edit Html എന്ന ടാബില്‍ ക്ലിക്ക് ചെയ്ത് (ബ്ലോഗര്‍ എഡിറ്റ് വിന്‍ഡോയുടെ വലത്ത്, മുകള്‍ ഭാഗത്ത് ഈ ഓപ്ഷന്‍ ലഭ്യമാണ്) അവിടെ കോഡ് എഴുതിച്ചേര്‍ക്കേണ്ടതുണ്ട്. പോസ്റ്റ് മുഴുവനായി ടൈപ്പ് ചെയ്തതിനു ശേഷം പബ്ലിഷ് ചെയ്യുന്നതിനു തൊട്ടുമുന്‍പ് ഇതു ചെയ്യുന്നതാണ് നല്ലത്. താഴെക്കാണുന്ന ചിത്രത്തില്‍ എന്റര്‍ ചെയ്തിരിക്കുന്ന കോഡ് അതേ രീതിയില്‍ പോസ്റ്റിന്റെ തുടക്കത്തിലും ഒടുക്കത്തിലും എന്റര്‍ ചെയ്യുക.

സൂചന: ചിത്രത്തില്‍ മൌസമര്‍ത്തിയാല്‍ പൂര്‍ണ്ണരൂപം പുതിയ വിന്‍ഡോയില്‍ ദൃശ്യമാവും.

• ഇത് അഞ്ജലി ഫോണ്ട് സെറ്റ് ചെയ്യാത്ത ടെക്സ്റ്റ് - ന്‍, ല്‍, ര്‍, ണ്‍, ള്‍.
• ഇത് അഞ്ജലി ഫോണ്ട് സെറ്റ് ചെയ്ത ടെക്സ്റ്റ് - ന്‍, ല്‍, ര്‍, ണ്‍, ള്‍.
(ശ്രദ്ധിക്കുക: ഐ.ഇ-യില്‍ മുകളിലെ രണ്ട് വരികളും തമ്മില്‍ വ്യത്യാസമൊന്നും ഉണ്ടാവുകയില്ല. ഫയര്‍ഫോക്സില്‍ മാത്രമേ വ്യത്യാസം അറിയുവാന്‍ സാധിക്കുകയുള്ളൂ.)
അഞ്ജലി ഓള്‍ഡ് ലിപി അല്ലാതെ ലഭ്യമായ മറ്റ് മലയാളം യൂണിക്കോഡ് ഫോണ്ടുകളും ഇതിനായി ഉപയോഗിക്കാവുന്നതാണ്. ഉദാ: രചന(font-family:Rachana_w01), കാര്‍ത്തിക(font-family:Kartika) എന്നിങ്ങനെ. ഒരു കാര്യം ശ്രദ്ധിക്കുക, ഫോണ്ട് ഫയല്‍ സിസ്റ്റത്തില്‍ സേവ് ചെയ്തിരിക്കുന്ന പേരല്ല ഈവിടെ ഫോണ്ട് ഫാമിലിയില്‍ നല്‍കേണ്ടത്. ഫോണ്ട് C:\Windows\Fonts എന്ന ഫോള്‍ഡറില്‍ സേവ് ചെയ്തിരിക്കുന്ന പേര്‍ അല്ലെങ്കില്‍ ഫോണ്ട് വ്യൂവറില്‍ Typeface name: ആയി നല്‍കിയിരിക്കുന്ന പേര്‍; അതാണ് font-family ആയി നല്‍കേണ്ടത്.

2. കമന്റ് ഫോര്‍മാറ്റിംഗ്
ബ്ലോഗുക്കളില്‍ പലപ്പോഴും ഞാന്‍ കണ്ടിട്ടുള്ള ഒരു പ്രശ്നമാണ്. ലിങ്കുകള്‍ കമന്റായി ഇടുമ്പോള്‍, ഹൈപ്പര്‍ ലിങ്ക് ടെക്സ്റ്റായി നല്‍കാത്തതിനാല്‍, ലിങ്ക് പൂര്‍ണ്ണമായി ബ്ലോഗില്‍ ദൃശ്യമാവുന്നില്ല എന്നത്. ലിങ്ക് ഇട്ടതിന്റെ പ്രയോജനം തന്നെ ഇല്ലാതാക്കുന്നതാണ് പലപ്പൊഴും ഇത്. ചെറിയ യു.ആര്‍.എല്‍ ലിങ്കായി നല്‍കുമ്പോള്‍ ഇതിന്റെ പ്രയാസം മനസിലാവില്ല, പക്ഷെ യു.ആര്‍.എല്ലിന്റെ നീളം കൂടും തോറും ഇത് അസൌകര്യമുണ്ടാക്കുന്നു. ലിങ്ക് ഹൈപ്പര്‍ ലിങ്കായി നല്‍കുവാന്‍ വളരെ എളുപ്പമാണ്. അതുപോലെ കമന്റിലെ ചിലഭാഗങ്ങള്‍ എടുത്തു കാണിക്കുവാനായി ബോള്‍ഡാക്കുകയോ ഇറ്റാലിക്കാക്കുകയോ ചെയ്യാവുന്നതുമാണ്. താഴെക്കാണുന്ന രീതിയിലാണ് ഓരോന്നിനും എന്റര്‍ ചെയ്യേണ്ടത്. ഹൈപ്പര്‍ ലിങ്ക് നല്‍ക്കുമ്പോള്‍ ഒരു കാര്യം പ്രത്യേകം ശ്രദ്ധിക്കുക. യു.ആര്‍.എല്‍ പൂര്‍ണ്ണരൂപത്തില്‍, അതായത് http:// സഹിതം നല്‍കുക.


3. ചിത്രങ്ങള്‍ പുതിയ ജാലകത്തില്‍
എന്റെ ബ്ലോഗുകളില്‍ ഉപയോഗിച്ചിരിക്കുന്നതു കണ്ടാവണം, പലരും എന്നോടു ചോദിക്കുകയുണ്ടായി, ചിത്രങ്ങള്‍ എങ്ങിനെയാണ്, പോസ്റ്റില്‍ ചെറുതായി നല്‍കിയ ശേഷം, അതില്‍ ക്ലിക്ക് ചെയ്യുമ്പോള്‍ പുതിയ ജാലകത്തില്‍ അതിന്റെ യഥാര്‍ത്ഥ വലുപ്പത്തില്‍ തുറക്കുന്നതെന്ന്. ഒട്ടും പ്രയാസമില്ലാത്ത ഒരു കാര്യമാണിത്. ആദ്യമായി സാധാരണ ചെയ്യുന്നതുപോലെ ചിത്രം അപ്‌ലോഡ് ചെയ്യുക. ചിത്രം ബ്ലോഗറില്‍ ചേര്‍ത്ത് കഴിയുമ്പോള്‍ Edit Html എന്ന ടാബിലേക്ക് മാറുക. താഴെക്കാണുന്ന രീതിയിലാവും അപ്പോളതിന്റെ കോഡ് ലഭ്യമാവുക.

സൂചന: ചിത്രത്തില്‍ മൌസമര്‍ത്തിയാല്‍ പൂര്‍ണ്ണരൂപം പുതിയ വിന്‍ഡോയില്‍ ദൃശ്യമാവും.

ഈ കോഡില്‍ ചെറിയ ചില മാറ്റങ്ങള്‍ വരുത്തിയാല്‍ മാത്രം മതിയാവും മുകളില്‍ പറഞ്ഞ സാധ്യത ലഭ്യമാകുവാന്‍. ആദ്യമായി പോസ്റ്റില്‍ വരേണ്ട ചിത്രം എത്ര പൊക്കവും വീതിയും ഉള്ളതാവണമെന്ന് തീരുമാനിക്കുക. ആനുപാതികമായി വേണം പൊക്കത്തിലും വീതിയിലും കുറവു വരുത്തുവാന്‍. അല്ലെങ്കില്‍ ചിത്രം നന്നായിത്തോന്നില്ല. ഉദാ: 800 X 600 പിക്സത്സ് വലുപ്പത്തിലുള്ള ചിത്രമാണെന്നിരിക്കട്ടെ. നമുക്ക് വീതി 320-ലേക്ക് കുറയ്ക്കണം. അപ്പോള്‍ ആനുപാതികമായ പൊക്കം എന്നു പറയുന്നത് 240 പിക്സത്സ് ആയിരിക്കും. അതായത് (320/800)*600. ഇത് width="320" height="240" എന്ന രീതിയില്‍ img-ടാഗില്‍ കൂട്ടിച്ചേര്‍ക്കുക. ചിത്രം പുതിയ വിന്‍ഡോയില്‍ തുറക്കുവാനായി a-ടാഗിനുള്ളില്‍, href="http://image-url-here.gif" എന്നതിനു ശേഷം target="_blank" എന്നു നല്‍കുക. പുതുക്കിയ കോഡാണ് താഴെക്കാണുന്നത്.

സൂചന: ചിത്രത്തില്‍ മൌസമര്‍ത്തിയാല്‍ പൂര്‍ണ്ണരൂപം പുതിയ വിന്‍ഡോയില്‍ ദൃശ്യമാവും.

ഇനി ചിത്രങ്ങള്‍ ടെക്സ്റ്റ് ഹൈപ്പര്‍ ലിങ്കായും ദൃശ്യമാക്കാവുന്നതാണ്. പുതിയ ബ്ലൊഗര്‍ നിങ്ങളുടെ ഗൂഗിള്‍ അക്കൌണ്ടാണല്ലോ ഉപയോഗിക്കുക. പിക്കാസ-വെബ് എന്ന ഗൂഗിളിന്റെ ഇമേജ്-ഷെയറിംഗ് സേവനവുമായി നിങ്ങളുടെ ബ്ലോഗിനെ ബന്ധിപ്പിച്ചിരിക്കുന്നു. http://picasaweb.google.com/home എന്ന സൈറ്റില്‍, നിങ്ങള്‍ ബ്ലോഗ് ചെയ്യുന്ന ഗൂഗിള്‍ അക്കൌണ്ട് ഉപയോഗിച്ച് ലോഗ്-ഇന്‍ ചെയ്യുക. നിങ്ങളുടെ ബ്ലോഗിന്റെ പേരില്‍ ഒരു ഫോള്‍ഡര്‍(ആല്‍ബം) ലഭ്യമായിരിക്കും(ഒരു ചിത്രമെങ്കിലും ഉപയോഗിച്ചിട്ടുള്ള ബ്ലോഗുകള്‍ മാത്രമേ ഇവിടെ കാണുവാനാകൂ, അതും പഴയ പോസ്റ്റുകളിലെ ചിത്രങ്ങള്‍ ഇവിടെ ലഭ്യമായിരിക്കുകയുമില്ല). ബ്ലോഗ് പോസ്റ്റുകളില്‍ നിങ്ങള്‍ ഉപയോഗിച്ചിരിക്കുന്ന ചിത്രങ്ങള്‍ അതാത് പിക്കാസ-ആല്‍ബത്തില്‍ സൂക്ഷിക്കപ്പെട്ടിരിക്കും. എന്നാല്‍ ഇത് പബ്ലിക്കായി ലിസ്റ്റ് ചെയ്തിട്ടുണ്ടാവില്ല. ഒരു ചിത്രം ബ്ലോഗ് പോസ്റ്റില്‍ അപ്‌ലോഡ് ചെയ്ത ശേഷം ഡിലീറ്റ് ചെയ്താലും ഗൂഗിള്‍ സെര്‍വറില്‍ നിന്നും അത് ഡിലീറ്റ് ചെയ്യപ്പെടില്ല്ല; ആല്‍ബത്തില്‍ അത് സൂക്ഷിക്കപ്പെടും. ആല്‍ബത്തില്‍ നിന്നും ആവശ്യമില്ലാത്ത ചിത്രങ്ങള്‍ ഡിലീറ്റ് ചെയ്യാവുന്നതാണ്. ഹൈപ്പര്‍ ലിങ്കായി ചിത്രത്തിന്റെ യു.ആര്‍.എല്‍ നല്‍കുവാന്‍ ചിത്രം പോസ്റ്റില്‍ അപ്ലോഡ് ചെയ്തതിനു ശേഷം ഒറിജിനല്‍ ലിങ്കിലെ img-ടാഗ് ഒഴിവാക്കുക. പകരം ചിത്രത്തിന്റെ പേര് നല്‍കുക. അതിനു ശേഷം ആവശ്യമുള്ള സ്ഥലത്ത് a-ടാഗ് മുഴുവനായും കൊണ്ടുപോയി വെയ്ക്കുക. ഈ ആ‍വശ്യത്തിനായി പുതുക്കിയ കോഡ് ഇവിടെ കാണാവുന്നതാണ്.

4. അനോണികളെ ഒഴിവാക്കാം
ഒരു ബ്ലോഗില്‍ ആര്‍ക്കൊക്കെ കമന്റ് ചെയ്യാം എന്നത് ഓരോ ബ്ലോഗ് ഉടമയ്ക്കും തീരുമാനിക്കാവുന്നതാണ്. അതിനായി Dashboard > Settings വഴി Comments എന്ന ടാബിലെത്തുക. അവിടെ Who can Comment? എന്നതില്‍ മൂന്ന് ഓപ്ഷനുകള്‍ ലഭ്യമാണ്. Only Registered Users, Anyone, Only Members of this Blog എന്നിവയാണ് ആ ഓപ്ഷനുകള്‍. ഇതില്‍ ആദ്യത്തെ ഓപ്ഷന്‍ - Only Registered Users, സെലക്ട് ചെയ്താല്‍ ഗൂഗിള്‍ അക്കൌണ്ട് ഉള്ളവര്‍ക്കു മാത്രമേ കമന്റ് ചെയ്യുവാന്‍ സാധിക്കുകയുള്ളൂ. ആ അക്കൌണ്ടില്‍ മറ്റൊരു ബ്ലോഗുണ്ടെങ്കില്‍, അത് പ്രൊഫൈല്‍ പേജില്‍ ദൃശ്യമായിരിക്കുകയും ചെയ്യും (പ്രൊഫൈല്‍ പബ്ലിക് ഷെയേഡ് ആണെങ്കില്‍ മാത്രം.). ഈ ഓപ്ഷന്‍ സെല്‍ക്ട് ചെയ്യുന്നതുകൊണ്ട്, നമുക്ക് വ്യക്തികളെ ഒരുപക്ഷെ മനസിലാക്കുവാന്‍ സാധിക്കുകയില്ലെങ്കിലും, ആ അക്കൌണ്ടില്‍ വരുന്ന ആക്ടിവിറ്റികള്‍ ഗൂഗിള്‍ ട്രാക്ക് ചെയ്യുന്നതിനാല്‍, ഗുരുതരമായ എന്തെങ്കിലും പ്രശ്നം ഒരു കമന്ററുടെ ഭാഗത്തു നിന്നുണ്ടായാല്‍ (ഉദാ: തുടര്‍ച്ചയായ അസഭ്യകമന്റുകള്‍) ഗൂഗിളില്‍ പരാതിപ്പെടുവാന്‍ ഈ ഐ.ഡി. ഉപയോഗിക്കാം. ഒരുപക്ഷെ, കമന്റുകള്‍ എല്ലാവര്‍ക്കും ചെയ്യുവാന്‍ സാധിക്കാത്തതിനാല്‍, കമന്റുകളുടെ എണ്ണം കുറയുമായിരിക്കാം. എന്നാല്‍ ഒന്നോര്‍ക്കുക, ഇന്ന് ഗൂഗിള്‍ അക്കൌണ്ട് ഉപയോഗിക്കാത്തവരും വളരെ വിരളമാണല്ലോ?

Anyone എന്ന ഓപ്ഷനാണ് അടുത്തത്. പോസ്റ്റ് വായിക്കുന്ന ആര്‍ക്കും ഈ ഓപ്ഷനാണ് സെലക്ട് ചെയ്യുന്നതെങ്കില്‍ കമന്റ് ചെയ്യുവാന്‍ സാധിക്കും. ഗൂഗിള്‍ അക്കൌണ്ടില്ലാത്തവര്‍ക്കും അഭിപ്രായം പറയുവാന്‍ സാധിക്കുമെങ്കിലും, ഇത് പലപ്പോഴും ദുരുപയോഗം ചെയ്യപ്പെടുന്നു. ഈ സൌകര്യം നല്‍കിയിട്ട്, കമന്റുകളില്‍ കൂടി ഉപദ്രവം നേരിട്ടാല്‍, ഫലപ്രദമായി കമന്റിട്ടയാളെ കണ്ടെത്തുവാന്‍ കഴിഞ്ഞുവെന്നു വരില്ല. Only Members of this Blog എന്നത് ഗ്രൂപ്പ് ബ്ലോഗുകളിലാണ് ഉപയോഗിക്കപ്പെടുക. അതായത്, ഒന്നില്‍ കൂടുതല്‍ പേര്‍ ചേര്‍ന്ന് എഴുതുന്ന ബ്ലോഗുകളില്‍, ഈ ഓപ്ഷന്‍ സെലക്ട് ചെയ്താല്‍, ആ ബ്ലോഗില്‍ എഴുതുവാന്‍ അര്‍ഹതപ്പെട്ടവര്‍ക്കു മാത്രമേ കമന്റ് ചെയ്യുവാനും സാധിക്കുകയുള്ളൂ. വളരെ വിരളമായി മാത്രം ഉപയോഗിക്കപ്പെടുന്ന ഓപ്ഷനാണിത്. പോസ്റ്റുമായി ബന്ധമില്ല്ലാത്ത കമന്റുകള്‍ ഒഴിവാ‍ക്കുവാനാ‍യി Comment Moderation എന്ന ഓപ്ഷനും ഉപയോഗിക്കാവുന്നതാണ്.

വേഡ് വേരിഫിക്കേഷന്‍ എന്നൊരു ഓപ്ഷനും ബ്ലോഗറില്‍ കമന്റ് ചെയ്യുന്നത് അഡ്മിനിസ്ട്രേറ്റ് ചെയ്യുവാന്‍ ലഭ്യമാണ്. ഒരു ഇമേജില്‍ കാണുന്ന അക്ഷരങ്ങളോ അക്കങ്ങളോ ടെക്സ്റ്റ് ബോക്സില്‍ എന്റര്‍ ചെയ്യുക എന്നതാണ് ഇതുകൊണ്ട് ഉദ്ദേശിക്കുന്നത്. സോഫ്റ്റ്വെയര്‍ പ്രോഗ്രാമുകളുപയോഗിച്ച് പരസ്യങ്ങളും മറ്റും ആട്ടോമാറ്റിക്കായി കമന്റ് ചെയ്യുന്നതിനെ ചെറുക്കൂവാനാണ് ഈ ഓപ്ഷന്‍. അങ്ങിനെ സ്പാം കമന്റുകള്‍ ധാരാളമായി വരുന്നുണ്ടെങ്കില്‍ മാത്രം ഈ ഓപ്ഷന്‍ ആക്ടീവാക്കിയാല്‍ മതിയാവും. ബ്ലോഗുകളില്‍ പലരും ഇത് അനാവശ്യമായി ഉപയോഗിച്ചുവരുന്നതായിക്കാണുന്നു. അനോണികളെ തടയുവാനുള്ള ഒരു മാര്‍ഗമാണിതും എന്നൊരു തെറ്റിദ്ധാരണയും ചിലര്‍ക്കെങ്കിലുമുണ്ടെന്ന് തോന്നുന്നു. സ്പാം കമന്റുകള്‍ വരുന്നില്ലായെങ്കില്‍ ഈ ഓപ്ഷന്‍ ഒഴിവാക്കുന്നതാണ് നല്ലത്.

5. ഓര്‍ക്കുട്ടും ബ്ലോഗറും
മലയാളത്തില്‍ ബ്ലോഗ് ചെയ്യുന്ന ഒട്ടുമിക്കവപ്പേരും ഓര്‍ക്കുട്ടിലും അംഗങ്ങളാണല്ലോ. ഓര്‍ക്കുട്ടിന്റെ പുതിയ ഒരു സാധ്യതയാണ്, പ്രൊഫൈല്‍ പേജില്‍ നമുക്കിഷ്ടപ്പെട്ട അഞ്ചു ഫീഡുകള്‍ എന്റര്‍ ചെയ്യാമെന്നത്. അതിനായി ഓര്‍ക്കുട്ടില്‍ ലോഗിന്‍ ചെയ്ത്, ഹോം പേജില്‍ നമ്മുടെ പ്രൊഫൈല്‍ ചിത്രത്തിന് കീഴെ നല്‍കിയിരിക്കുന്ന ഓപ്ഷനുകളില്‍ edit feeds എന്ന ഓപ്ഷനില്‍ ക്ലിക്ക് ചെയ്യുക. ചിത്രം ശ്രദ്ധിക്കുക.


തുടര്‍ന്ന്‍ നമുക്ക് പ്രൊഫൈലിലേക്ക് ഫീഡ് എന്റര്‍ ചെയ്യുവാനുള്ള ഓപ്ഷനുകള്‍ ലഭ്യമായ ഒരു പേജ് ലഭ്യമാവും. ഓര്‍ക്കുട്ടില്‍ ഉപയോഗിക്കുന്ന ഐഡി തന്നെയാണ് ബ്ലോഗ് ചെയ്യുവാനും ഉപയോഗിക്കുന്നതെങ്കില്‍ സ്വന്തം ബ്ലോഗുകള്‍ അവിടെ ലിസ്റ്റ് ചെയ്യും. add എന്ന ബട്ടണില്‍ ക്ലിക്ക് ചെയ്ത് ഫീഡ് my feeds-ലേക്ക് ചേര്‍ക്കാവുന്നതാണ്. മറ്റേതെങ്കിലും ഫീഡാണ് ചേര്‍ക്കേണ്ടതെങ്കില്‍ Url: എന്ന ടെക്സ്റ്റ് ബോക്സില്‍ ഫീഡിന്റെ അഡ്രസ് എന്റ്ര് ചെയ്ത ശേഷം add എന്ന ബട്ടണമര്‍ത്തിയാല്‍ മതിയാവും.

ഇതിന്റെ മറ്റൊരു സാധ്യത, ഫീഡ് യൂ.ആര്‍.എല്‍ ആയി പൈപ്പുകളെക്കുറിച്ചുള്ള പോസ്റ്റില്‍ പരിചയപ്പെട്ട പിന്മൊഴികള്‍ എന്ന പൈപ്പ് തന്നെ നല്‍കാമെന്നതാണ്. ഓര്‍ക്കുട്ടില്‍ പിന്മൊഴിവായന ഇതുമൂലം സാധ്യമാവും. പിന്മൊഴികള്‍ക്കുമുകളില്‍ വലതു മൌസ് ബട്ടണ്‍ അമര്‍ത്തി, മെനുവില്‍ നിന്നും ലിങ്ക് മാത്രമായി കോപ്പി ചെയ്യുക. അത് ഓര്‍ക്കുട്ടില്‍, ഫീഡ് യു.ആര്‍.എല്‍ എന്റര്‍ ചെയ്യുവാനുള്ള ടെക്സ്റ്റ് ബോക്സില്‍ പേസ്റ്റ് ചെയ്യുക. നമ്മുടെ പ്രൊഫൈല്‍ പേജില്‍ പോയി, ഫീഡിലൊന്ന് ക്ലിക്ക് ചെയ്താല്‍, പിന്മൊഴികള്‍ വായിക്കാവുന്നതാണ്. താഴെക്കൊടുത്തിരിക്കുന്ന ചിത്രം കാണൂ.

സൂചന: ചിത്രത്തില്‍ മൌസമര്‍ത്തിയാല്‍ പൂര്‍ണ്ണരൂപം പുതിയ വിന്‍ഡോയില്‍ ദൃശ്യമാവും.
--

Post a Comment

Keywords: Tips & Tricks, Blogger, Orkut, Edit Feed, Comment Settings, Pipes, Pinmozhikal, Marumozhikal, Formatting, Images open in New Window, Anonymous, Block, Image Hyperlink Text, Displaying Unicode Correctly in FireFox
--

യാഹൂവിന്റെ പുതിയ സേവനമായ Pipes-നെക്കുറിച്ച് ഇപ്പോള്‍ എല്ലാവര്‍ക്കും അറിവുണ്ടാവും. എന്താണ് പൈപ്പുകള്‍, ഇവ എങ്ങിനെ നമുക്ക് ബ്ലോഗിംഗില്‍ പ്രയോജനപ്പെടുത്താം എന്നൊക്കെ ലളിതമായി വിശദീകരിക്കുവാന്‍ ശ്രമിച്ചിരിക്കുന്നു ഇവിടെ. പൈപ്പുകളെക്കുറിച്ച് യാഹൂ പറയുന്നത് ഇങ്ങിനെ: Pipes is an interactive data aggregator and manipulator that lets you mashup your favorite online data sources.

എന്താണ് പൈപ്പുകള്‍?
വെബ് സൈറ്റുകളിലെ RSS ഫീഡുകള്‍ എല്ലാവര്‍ക്കും ഇന്ന് പരിചിതമാണ്. വെബ് സൈറ്റില്‍ പുതുതായി എന്തൊക്കെ ചേര്‍ക്കപ്പെട്ടു എന്നറിയുവാന്‍, ദിനവും വെബ് സൈറ്റ് സന്ദര്‍ശിക്കുക, എന്ന ബുദ്ധിമുട്ട് ഫീഡുകളുടെ വരവോടെ ഇല്ലാതായി. അതാത് സൈറ്റുകളില്‍ നല്‍കിയിരിക്കുന്ന ഫീഡുകള്‍ സബ്‌സ്ക്രൈബ് ചെയ്താല്‍ മാത്രം മതിയാവും, വെബ് സൈറ്റിലെ ഓരോ പുതു കൂട്ടിച്ചേര്‍ക്കലുകളും നിങ്ങളുടെ ഫീഡ് റീഡറില്‍ (ഉദാ: ഗൂഗിള്‍ റീഡര്‍, ബ്ലോഗ് ലൈന്‍സ്, മൈ യാഹൂ) എത്തിച്ചേരും. നിങ്ങളുടെ റീഡര്‍ സന്ദര്‍ശിക്കുമ്പോള്‍, നിങ്ങള്‍ സബ്‌സ്ക്രൈബ് ചെയ്തിരിക്കുന്ന എല്ലാ വെബ് സൈറ്റുകളിലും വന്നിട്ടുള്ള അപ്‌ഡേറ്റ്സ് നിങ്ങളുടെ റീഡറില്‍ ദൃശ്യമാവും. ചില വെബ് സൈറ്റുകള്‍ പുതുതായി കൂട്ടിച്ചേര്‍ക്കുന്ന വിവരങ്ങള്‍ പൂര്‍ണ്ണമായും ഫീഡില്‍ അനുവദിക്കുമ്പോള്‍, ചിലവ ഉള്ളടക്കം മാത്രം നല്‍കുന്നു. താത്പര്യം തോന്നുന്നെങ്കില്‍ ഉള്ളടക്കത്തില്‍ ക്ലിക്ക് ചെയ്ത് അവരുടെ വെബ് പേജിലെത്തി മുഴുവനും കാണാവുന്നതാണ്.

ഇതില്‍ പൈപ്പുകള്‍ എന്താണ് ചെയ്യുന്നത്? ഇങ്ങിനെ ധാരാളം ഫീഡുകള്‍ നമ്മള്‍ സബ്സ്ക്രൈബ് ചെയ്തു എന്നിരിക്കട്ടെ. എന്നാല്‍, ഓരോ സൈറ്റിലേയും ഫീഡുകളില്‍, എല്ലാ വിഷയത്തിലും നമുക്ക് താത്പര്യമുണ്ടാവണമെന്നില്ല. ഉദാ: ഒരു വെബ് സൈറ്റ് സിനിമയെക്കുറിച്ചും പുസ്തകങ്ങളെക്കുറിച്ചും വിവരങ്ങള്‍ തരുന്നു എന്നു കരുതുക. നമുക്ക് പുസ്തകങ്ങളെക്കുറിച്ച് മാത്രം അറിഞ്ഞാല്‍ മതി. എന്നാല്‍ അവരുടെ ഫീഡില്‍ രണ്ട് വിവരങ്ങളും അപ്ഡേറ്റ് ചെയ്തുകൊണ്ടിരിക്കും. അപ്പോള്‍, പൈപ്പ് ഉപയോഗിച്ച് നമുക്ക് പുസ്തകങ്ങളുടെ വിവരങ്ങള്‍ മാത്രമായി ഫില്‍റ്റര്‍ ചെയ്യുവാന്‍ സാധിക്കും. ഇത് ഒരു ഉദാഹരണം മാത്രം. ഒന്നിലധികം ഫീഡുകള്‍ ഒറ്റക്കെട്ടാക്കി ഒരു ടൈറ്റിലില്‍ സബ്സ്ക്രൈബ് ചെയ്യുക. ഒരു ഫീഡിനെ തന്നെ രണ്ട് പേരുകളില്‍ ഡ്യൂപ്ലിക്കേറ്റ് ചെയ്യുക, ഇങ്ങിനെ കുറേയധികം സാധ്യതകള്‍ പൈപ്പിനുണ്ട്.

പൈപ്പുകളും ബ്ലോഗിംഗും
പൈപ്പുകള്‍ എങ്ങിനെ ബ്ലോഗിംഗില്‍ പ്രയോജനപ്പെടുത്താം? പൈപ്പ് എങ്ങിനെ ഉണ്ടാക്കാം എന്നറിഞ്ഞുകഴിഞ്ഞാല്‍ നിങ്ങള്‍ക്കു തന്നെ സ്വന്തമായി ധാരാളം പ്രയോജനങ്ങള്‍ കണ്ടെത്തുവാന്‍ കഴിയും. അതിനായി പൈപ്പിന്റെ ഒരു ഉപയോഗവും അതെങ്ങിനെ സാധ്യമാക്കാം എന്നും ഇവിടെ വിശദമാക്കുന്നു.

നിങ്ങള്‍ക്ക് ഒന്നിലധികം ബ്ലോഗുകളുണ്ടെന്നു കരുതുക. എല്ലാ ബ്ലോഗിലും പല പോസ്റ്റുകളിലായി വരുന്ന കമന്റുകള്‍ ചിലപ്പോള്‍ കണ്ടു എന്നു തന്നെ വരില്ല, പിന്നല്ലേ അവയ്ക്ക് മറുപടി നല്‍കുന്നത്! ഒരു പോംവഴി, എല്ല ബ്ലോഗിന്റേയും കമന്റ് ഫീഡ് നിങ്ങളുടെ റീഡറില്‍ ചേര്‍ക്കുക എന്നതാണ്. എന്നാല്‍ പൈപ്പുകള്‍ ഉപയോഗിച്ച് എല്ലാ കമന്റ് ഫീഡുകളും ഒരൊറ്റ ഫീഡാക്കി നിങ്ങളുടെ റീഡറില്‍ കൂട്ടിച്ചേര്‍ക്കുവാന്‍ കഴിയും. ഇത് എത്രമാത്രം ഉപകാരപ്രദമാണെന്ന് ഉപയോഗിച്ചു തന്നെ മനസിലാക്കണം.

ഇതിനായി ആദ്യം, നിങ്ങളുടെ ഓരോ ബ്ലോഗിന്റേയും ഫീഡ് സെറ്റിംഗുകള്‍ അഡ്ജസ്റ്റ് ചെയ്യേണ്ടതുണ്ട്. ബ്ലോഗറില്‍ Settings > Site Feed എന്ന ടാബിലാണ് ഫീഡ് സെറ്റിംഗ്സ് ലഭ്യമായിരിക്കുന്നത്. Switch to: Advanced Mode സെലക്ട് ചെയ്താല്‍ കൂടുതല്‍ ഓപ്ഷനുകള്‍ ലഭ്യമാവും. Blog Posts Feed, Blog Comment Feed, Per-Post Comment Feeds എന്നിങ്ങനെ മൂന്ന് ഓപ്ഷനുകള്‍ ലഭ്യമാവും. ഇവയ്ക്ക് മൂന്നിനും None, Short, Full എന്നിങ്ങനെ മൂന്ന് സബ്ബ്-ഓപ്ഷനുകളും ലഭ്യമായിരിക്കും. Blog Posts Feed എന്നത് ബ്ലോഗിലെ പോസ്റ്റുകളുടെ ഫീഡിനെക്കുറിക്കുന്നു. ബ്ലോഗില്‍ ഓരോ പുതിയ പോസ്റ്റ് ചേര്‍ക്കപ്പെടുമ്പോഴും ഈ ഫീഡ് സബ്‌സ്ക്രൈബ് ചെയ്തിരിക്കുന്നവരുടെ റീഡറില്‍ ആ പോസ്റ്റ് ദൃശ്യമാവും. അങ്ങിനെ ദൃശ്യമാക്കണമെന്നില്ലെങ്കില്‍, None സെലക്ട് ചെയ്യുക. പോസ്റ്റിന്റെ കുറച്ചു ഭാഗം മാത്രം ദൃശ്യമാക്കുവാന്‍ Short എന്ന ഓപ്ഷനും, മുഴുവനായും ദൃശ്യമാക്കുവാന്‍ Full എന്ന ഓപ്ഷനും സെലക്ട് ചെയ്യാവുന്നതാണ്. Blog Comment Feed എന്നത്, ആ ബ്ലോഗിലെ എല്ലാ പോസ്റ്റിലും വരുന്ന കമന്റുകള്‍ അഗ്രിഗേറ്റ് ചെയ്യുന്ന ഫീഡിനേയും, Per-Post Comment Feeds എന്നത് ഓരോ പോസ്റ്റിലും വരുന്ന കമന്റുകള്‍ പ്രത്യേകമായി അഗ്രിഗേറ്റ് ചെയ്യുന്ന ഫീഡുകളേയും സൂചിപ്പിക്കുന്നു. ഇതില്‍ Blog Comment Feed എന്നത് Full എന്ന് സെലക്ട് ചെയ്യുക. ഈ ഫീഡാണ് നമ്മള്‍ പൈപ്പ് ചെയ്ത് റീഡറില്‍ എത്തിക്കുവാന്‍ പോകുന്നത്. ചിത്രം ശ്രദ്ധിക്കുക.

സൂചന: ചിത്രത്തില്‍ മൌസമര്‍ത്തിയാല്‍, ചിത്രത്തെ പുതിയ വിന്‍ഡോയില്‍ വലുതായി കാണാവുന്നതാണ്.

ഒരു പൈപ്പ് എങ്ങിനെ സ്വന്തമായുണ്ടാക്കാം?
സ്വന്തമായി യാഹൂവില്‍ ഒരു പൈപ്പുണ്ടാക്കുവാന്‍ http://pipes.yahoo.com എന്ന വെബ് സൈറ്റിലെത്തുകയാണ് ആദ്യം വേണ്ടത്. അവിടെ നിങ്ങളുടെ യാഹൂ! യൂസര്‍ നെയിം/പാസ്‌വേഡ് എന്റര്‍ ചെയ്ത് ലോഗിന്‍ (വലതു വശത്ത് മുകള്‍ ഭാഗത്തായി Login ലിങ്ക് ലഭ്യമാണ്) ചെയ്യുക. തുടര്‍ന്ന് പ്രധാന നാവിഗേഷനില്‍ ലഭ്യമായ Create a Pipe എന്ന ബട്ടണില്‍ മൌസമര്‍ത്തി പൈപ്പ് എഡിറ്റിംഗ് പേജിലെത്തുക. താഴെ ചിത്രത്തില്‍ കാണുന്നതിനു സമാനമായ ഒരു ജാലകമാവും നിങ്ങള്‍ക്ക് ലഭിക്കുക.

സൂചന: ചിത്രത്തില്‍ മൌസമര്‍ത്തിയാല്‍, ചിത്രത്തെ പുതിയ വിന്‍ഡോയില്‍ വലുതായി കാണാവുന്നതാണ്.

നമുക്ക് ഈ ജാലകത്തെ നാല് പ്രധാന ഭാഗങ്ങളായി തിരിക്കാം. (മുകളില്‍ കാണുന്ന ചിത്രം ശ്രദ്ധിക്കുക)
1. ഇവിടെയാണ് പൈപ്പ് നിര്‍മ്മാണത്തിനാവശ്യമായ വിവിധ കമ്പൊണെന്റുകള്‍ ലഭ്യമാക്കിയിരിക്കുന്നത്. ആവശ്യമുള്ള കമ്പൊണെന്റ് 2-ലേക്ക് ഡ്രാഗ് ചെയ്ത് ഡ്രോപ്പ് ചെയ്യുകയേ വേണ്ടൂ.
2. ഇവിടെയാണ് പൈപ്പിന്റെ നിര്‍മ്മാണം നടത്തുന്നത്. ഏതെങ്കിലും ഒരു കമ്പൊണെന്റ് ആഡ് ചെയ്തു കഴിഞ്ഞാല്‍, Pipe Output എന്നൊരു ബ്ലോക്ക് സ്വയം നിര്‍മ്മിക്കപ്പെടും.
3. ഓരോ കമ്പൊണെന്റിനെക്കുറിച്ചും വളരെ ചുരുങ്ങിയ ഒരു ഹെല്പ് ഇവിടെ ലഭിക്കും. 2-ല്‍ ചേര്‍ത്തിരിക്കുന്ന ഏതെങ്കിലും ഒരു കമ്പൊണെന്റിലെ ഹെല്‍പ്പ് ഐക്കണില്‍ (ടൈറ്റില്‍ ബാറില്‍) ക്ലിക്ക് ചെയ്യുക, ഇവിടെ അതിന്റെ വിവരണം കാണുവാന്‍ കഴിയും.
4. ഇത് ഡിബഗ്ഗര്‍ ഏരിയ. ഓരോ കമ്പൊണെന്റിലെത്തുമ്പോഴും അതിന്റെ ഔട്ട്പുട്ട് എന്താണെന്ന് ഇവിടെ ദൃശ്യമാക്കുന്നു.

ആദ്യമായി ആവശ്യമുള്ള കമന്റ് ഫീഡുകള്‍ പൈപ്പിലേക്ക് കൊണ്ടുവരണം. അതിനായി Source എന്ന ഗ്രൂപ്പില്‍ ആദ്യം കാണുന്ന Fetch Feed എന്ന കമ്പൊണെന്റ് എഡിറ്ററിലേക്ക് ചേര്‍ക്കുക. കൂട്ടത്തില് Pipe Output എന്ന കമ്പൊണെന്റും ദൃശ്യമാവും. താഴെക്കാണുന്ന ചിത്രം ശ്രദ്ധിക്കുക.


ബ്ലോഗിന്റെ കമന്റുകള്‍ പൈപ്പിലേക്ക് ചേര്‍ക്കുവാനായി, Fetch Feed കമ്പൊണെന്റില്‍, ഒരു ക്രോസ് [X] ബട്ടണ് വലതു ഭാഗത്തായി കാണുന്ന ടെക്സ്റ്റ് ഏരിയായില്‍ കമന്റ് ഫീഡ് എന്റര്‍ ചെയ്യുക. കൂടുതല്‍ ബ്ലോഗുകള്‍ എന്റര്‍ ചെയ്യുവാനായി, URL എന്നതിന്റെ ഇടതു ഭാ‍ഗത്ത് കാണുന്ന [+] ബട്ടണില്‍ മൌസമര്‍ത്തുക. ചേര്‍ത്ത URL ടെക്സ്റ്റ് ബോക്സ് ഒഴിവാക്കുവാനായി [X] ബട്ടണ്‍ ഉപയോഗിക്കാം.
http://your-blog-name.blogspot.com/feeds/comments/default
എന്ന രീതിയിലാണ് ഫീഡുകള്‍ നല്‍കേണ്ടത്. ഇതേ രീതിയില്‍ കൂടുതല്‍ URL ഫീ‍ല്‍ഡുകള്‍ കൂട്ടിച്ചേര്‍ത്ത് ആവശ്യമുള്ള ബ്ലോഗുകളുടെയെല്ലാം ഫീഡ് എന്റര്‍ ചെയ്യുക.

Fetch Feed കമ്പൊണെന്റും Pipe Output കമ്പൊണെന്റും കൂട്ടിച്ചേര്‍ക്കുവാനായി Fetch Feed ഐറ്റത്തിന്റെ കീഴ്‌ഭാഗത്ത് മധ്യത്തിലായി കാണുന്ന ചെറിയ വൃത്തത്തില്‍ ക്ലിക്ക് ചെയ്ത് ഡ്രാഗ് ചെയ്യുക. ഒരു പൈപ്പ് ദൃശ്യമാവും. മറ്റ് ഐറ്റങ്ങളുടെ മുകള്‍ ഭാഗത്ത് സമാനമായ ഒരു വൃത്തം കാണപ്പെടും. അതില്‍ ഏതാണോ ഹൈലൈറ്റ് ചെയ്യപ്പെടുക അതിലേക്കാവും ക്ലിക്ക് വെടുമ്പോള്‍ പൈപ്പ് കൂട്ടിച്ചേര്‍ക്കപ്പെടുക. താഴെക്കാണുന്ന ചിത്രം ശ്രദ്ധിക്കുക.


Pipe Output എന്ന ഐറ്റം സെലക്ട് ചെയ്യുക. Debugger ഏരിയായില്‍ ഇപ്പോള്‍ നമുക്ക് ലഭിക്കുന്ന ഔട്ട്പുട്ട് ദൃശ്യമാവും. എന്നാല്‍ ഇതിലൊരു കുഴപ്പമുണ്ട്. ആദ്യം ഏതു ഫീഡ് ലോഡാവുന്നോ അതിലെ കമന്റുകള്‍ ആദ്യം കാണിക്കും, രണ്ടാമത് ലോഡാവുന്ന ഫീഡിന്റെ കമന്റുകള്‍ മുഴുവന്‍ അടുത്തതായി, അങ്ങിനെയങ്ങിനെ മുഴുവന്‍ ഫീഡുകളും ലോഡാവുന്നതനുസരിച്ചാവും പൈപ്പിന്റെ ഔട്ട്പുട്ട്. നമുക്ക് ഏറ്റവും പുതുതായി വന്ന കമന്റല്ലേ ആദ്യം കാണേണ്ടത്? അതായത്, ഏറ്റവും അവസാനമാണ്, പുതിയ കമന്റ് അടങ്ങുന്ന ഒരു ഫീഡ് ലോഡാവുന്നതെങ്കില്‍ ഈ ഔട്ട്പുട്ട് പ്രയോജനപ്പെടുകയില്ലല്ലോ? അതിനാല്‍ ഈ ഫീഡുകളിലെ കമന്റുകള്‍ സോര്‍ട്ട് ചെയ്യുകയാണ് അടുത്ത പടി.

Operators എന്ന ഗ്രൂപ്പില്‍ നിന്നും നമുക്ക് Sort കമ്പൊണെന്റ് ലഭ്യമാവും. Sort കമ്പൊണെന്റില്‍ എന്തിനെ അധികരിച്ച് സോര്‍ട്ടിംഗ് നടത്തണം എന്നത് നല്‍കുവാന്‍ കഴിയും. ഇവിടെ നമുക്ക് കമന്റ് പബ്ലിഷ് ചെയ്ത ദിവസത്തെ അധികരിച്ചാണ് സോര്‍ട്ടിംഗ് ചെയ്യേണ്ടത്. അതിനാല്‍ ആദ്യത്തെ ഡ്രോപ്പ് ഡൌണ്‍ ബോക്സില്‍ നിന്നും item.pubDate എന്ന ഓപ്ഷന്‍ സെലക്ട് ചെയ്യുക. രണ്ടമത്തേതില്‍ നിന്നും descending എന്നതും സെലക്ട് ചെയ്യുക. പൈപ്പ് Fetch Feed-ല്‍ നിന്നും Sort-ലേക്കും തുടര്‍ന്ന് Pipe Output-ലേക്കും മാറ്റി കണക്ട് ചെയ്യുക. താഴെക്കാണുന്ന ചിത്രം ശ്രദ്ധിക്കുക.

സൂചന: ചിത്രത്തില്‍ മൌസമര്‍ത്തിയാല്‍, ചിത്രത്തെ പുതിയ വിന്‍ഡോയില്‍ വലുതായി കാണാവുന്നതാണ്.

ഇപ്പോള്‍ പുതിയ കമന്റുകള്‍ ഏറ്റവും മുകളിലെന്ന രീതിയില്‍ ദൃശ്യമാവും. എന്നാല്‍ ഇപ്പോഴും ഒരു പ്രശ്നമുണ്ട്. ബ്ലോഗിന്റെ ഉടമയിട്ട മറുപടി കമന്റുകളും ഫീഡിലെത്തും. അത് റീഡറില്‍ എത്തേണ്ട കാര്യമില്ലല്ലോ! ബ്ലോഗ് ഓണറുടെ കമന്റുകള്‍ ഒഴിവാക്കുവാനായി നമുക്ക് Filter എന്ന കമ്പൊണെന്റ് ഉപയോഗിക്കാം.

Operators എന്ന ഗ്രൂപ്പില്‍ തന്നെയാണ് Filter എന്ന ഐറ്റവും ലഭ്യമായിരിക്കുക. താഴെക്കാണുന്ന ചിത്രം ശ്രദ്ധിക്കുക.

സൂചന: ചിത്രത്തില്‍ മൌസമര്‍ത്തിയാല്‍, ചിത്രത്തെ പുതിയ വിന്‍ഡോയില്‍ വലുതായി കാണാവുന്നതാണ്.

ചിത്രത്തില്‍ കാണുന്ന രീതിയില്‍ [Block] items that match [any] of the following എന്ന് സെറ്റ് ചെയ്യുക. അതിനുശേഷം ആദ്യത്തെ Rule ഫീല്‍ഡില്‍ [item.author.name] [Contains] [your-display-name] എന്നു നല്‍കുക. എന്റെ ഡിസ്‌പ്ലേ നെയിമില്‍ ‘ഹരീ’ എന്നുള്ളതിനാല്‍ അതു നല്‍കിയിരിക്കുന്നു. ഒരേ പേരിലുള്ള രണ്ടുപേരുണ്ടെങ്കില്‍ ഇത് പ്രശ്നമാവും, അതിനാല്‍ ഡിസ്‌പ്ലേ നെയിമില്‍ എന്തെങ്കിലും സ്പെഷ്യല്‍ ക്യാരക്ടറോ മറ്റോ ചേര്‍ത്ത് വ്യത്യാസം വരുത്തുക.

ധാരാളം കമന്റുകള്‍ വരുന്ന ബ്ലോഗുകളാണെങ്കില്‍, ഓരോ പ്രാവശ്യവും എല്ലാ കമന്റും റീഡറിലേക്ക് ലോഡ് ചെയ്യേണ്ടതില്ലല്ലോ? അതിനായി നമുക്ക് Truncate എന്ന കമ്പൊണെന്റ് ഉപയോഗിക്കാം. Truncate feed after [desired-number] എന്നു നല്‍കുക. താഴെക്കാണുന്ന ചിത്രം ശ്രദ്ധിക്കുക.

സൂചന: ചിത്രത്തില്‍ മൌസമര്‍ത്തിയാല്‍, ചിത്രത്തെ പുതിയ വിന്‍ഡോയില്‍ വലുതായി കാണാവുന്നതാണ്.

ഇത്രയും ചെയ്തു കഴിഞ്ഞ്, മുകളില്‍ pipes ലോഗോയ്ക്ക് സമീപം untitled* എന്നതില്‍ ക്ലിക്ക് ചെയ്ത് ആവശ്യമുള്ള പേര്‍ നല്‍കി, വലതു ഭാഗത്തു കാണുന്ന Save ബട്ടണില്‍ അമര്‍ത്തി, ഈ പൈപ്പ് സേവ് ചെയ്യാവുന്നതാ‍ണ്. Back to My Pipes എന്നതില്‍ ക്ലിക്ക് ചെയ്ത് My Pipes എന്ന വിഭാഗത്തിലേക്ക് പോകാവുന്നതാണ്. അവിടെ ഈ പൈപ്പ് സേവ് ചെയ്തിട്ടുണ്ടാവും. ഇത് മറ്റുള്ളവരുമായി പങ്കുവെയ്ക്കുവാന്‍ Publish... എന്ന ബട്ടണ്‍ അമര്‍ത്തുക. My Pipes-ല്‍ പൈപ്പിന്റെ പേരില്‍ ക്ലിക്ക് ചെയ്ത് പൈപ്പ് റണ്‍ ചെയ്യാവുന്നതാണ്. റണ്‍ ചെയ്തതിനു ശേഷം ഇടതുഭാഗത്തായി കാണുന്ന Subscribe ബട്ടണില്‍ ക്ലിക്ക് ചെയ്ത് നിങ്ങളുടെ ഫീഡ് റീഡറിലേക്ക് ഈ പൈപ്പ് ചേര്‍ക്കാവുന്നതാണ്. ഇനി മുതല്‍ നിങ്ങളുടെ വിവിധ ബ്ലോഗുകളിലെ കമന്റുകള്‍ നിങ്ങളുടെ റീഡറില്‍ ലഭ്യമാവും. താഴെക്കാണുന്ന ചിത്രം ശ്രദ്ധിക്കുക.

സൂചന: ചിത്രത്തില്‍ മൌസമര്‍ത്തിയാല്‍, ചിത്രത്തെ പുതിയ വിന്‍ഡോയില്‍ വലുതായി കാണാവുന്നതാണ്.

ഉദാഹരണമായി എന്റെ ബ്ലോഗുകളിലെ കമന്റുകള്‍ ശേഖരിക്കുവാനുള്ള പൈപ്പ് ഇവിടെ കാണാവുന്നതാണ്: കമന്റ് ഫീഡ്
മുകളില്‍ കാണുന്ന ലിങ്കില്‍ പോയതിനു ശേഷം, Clone എന്ന ബട്ടണ്‍ ക്ലിക്ക് ചെയ്ത് ഈ ഫീഡിന്റെ ഒരു കോപ്പി നിങ്ങളുടെ പൈപ്പുകളുടെ കൂട്ടത്തിലേക്ക് ചേര്‍ക്കാവുന്നതാണ്. അതിന്റെ സോഴ്സ് എഡിറ്റ് ചെയ്ത്, ആവശ്യമുള്ള മാറ്റങ്ങള്‍ വരുത്തിയും ഉപയോഗിക്കാം.

ഉപയോഗപ്രദമായ ചില പൈപ്പുകള്‍
• മലയാളത്തിലെ എല്ലാ ബ്ലോഗ് പോസ്റ്റുകളും റീഡറില്‍ കാണുവാന്‍: മലയാളം ബ്ലോഗ് പോസ്റ്റുകള്‍
• വിവിധാ ബ്ലോഗുകളില്‍ വരുന്ന കമന്റുകള്‍ റീഡറില്‍ കാണുവാന്‍: പിന്മൊഴികള്‍
--

Post a Comment

Keywords: Yahoo, Yahoo!, Pipes, Pipe, Pinmozhikal, Malayalam Blogs, Malayalam Blog Posts, Marumozhikal, Comments, Comment, Posts, Post, Aggregator, How to, Make a, Tutorial, Instruction
--

ബ്ലോഗറില്‍ ലഭ്യമായ പ്രൊഫൈല്‍ വിഡ്‌ജറ്റിന്റെ ഒരു ഫ്ലാഷ് വേര്‍ഷനാണിത്. എന്നാലിത് കൂടുതല്‍ ഉപയോഗപ്രദമാണ്, കൂടുതല്‍ സാധ്യതകളും ഇതിനുണ്ട്. നിങ്ങളുടെ ചിത്രം, ഓര്‍ക്കുട്ട്/ബ്ലോഗര്‍ പ്രൊഫൈലുകള്‍, പിക്കാ‍സ ആല്‍‌ബം, യാഹൂ ചാറ്റ് സ്റ്റാറ്റസ് എന്നിവയും ഈ വിഡ്‌ജറ്റ് ദൃശ്യമാക്കും. കൂടാതെ നിങ്ങള്‍ക്ക് നിങ്ങളുടെ ബ്ലോഗുകള്‍ അല്ലെങ്കില്‍ തിരഞ്ഞെടുത്ത ബ്ലോഗുകളുടെ ഒരു ലിസ്റ്റും ആവശ്യമുള്ള തലക്കെട്ട് നല്‍കി ഇതില്‍ തന്നെ ദൃശ്യമാക്കുവാന്‍ കഴിയും. ആവശ്യമുള്ള ഓപ്ഷനുകള്‍ മാത്രം തിരഞ്ഞെടുക്കാവുന്നതാണ്, ഓരോന്നിനും ഇഷ്ടമുള്ള തലക്കെട്ട് നല്‍കുവാനും സാധിക്കും. ധാരാളം വേരിയബിളുകള്‍ സെറ്റ് ചെയ്യേണ്ടതിനാല്‍, നിങ്ങളുടെ ആവശ്യങ്ങള്‍ക്കനുസരിച്ചുള്ള കോഡ് ലഭ്യമാക്കുവാനുള്ള ഒരു കോഡ് ജനറേറ്ററും നല്‍കിയിരിക്കുന്നു.



മുകളില്‍ തന്നിരിക്കുന്നതാണ് പ്രൊഫൈല്‍ വിഡ്‌ജറ്റ് കോഡ് ജനറേറ്റര്‍.

പ്രാഥമിക വിവരങ്ങള്‍
1. പേര്: ഇവിടെ നിങ്ങളുടെ പേര് നല്‍കാവുന്നതാണ്. മലയാളം ഫോണ്ട് എംബഡ് ചെയ്തിട്ടുള്ളതിനാല്‍, മലയാളത്തിലും പേരു നല്‍കാം. പക്ഷെ, നേരിട്ട് ടൈപ്പ് ചെയ്യുവാന്‍ സാധിക്കുകയില്ല. ഇളമൊഴിയോ മറ്റോ ഉപയോഗിച്ച് ടൈപ്പ് ചെയ്ത ശേഷം അതിവിടേക്ക് കോപ്പി പേസ്റ്റ് ചെയ്താല്‍ മതിയാവും. URL ഫീല്‍ഡുകള്‍ ഒഴികെ എല്ലായിടവും ഈ രീതിയില്‍ മലയാളം എന്റര്‍ ചെയ്യാവാന്‍‍ സാധിക്കുന്നതാണ്. (പക്ഷെ വിഡ്ജറ്റില്‍ അത് എല്ലായ്‌പ്പോഴും ശരിയായി കാണിക്കണമെന്നില്ല. അനാവശ്യമായി സ്പേസ് അക്ഷരങ്ങള്‍ക്കിടയില്‍ വരുന്നുണ്ട്.)
2. ചിത്രം: ഇവിടെ നിങ്ങളുടെ പ്രൊഫൈല്‍ ചിത്രത്തിന്റെ URL അഡ്രസ് ആണ് നല്‍കേണ്ടത്. http:// കൂട്ടിച്ചേര്‍ത്തുള്ള പൂര്‍ണ്ണമായ അഡ്രസ് നല്‍കുക. സ്വന്തമായി സെര്‍വര്‍ സ്പേസ് ഇല്ലാത്തവര്‍ ബ്ലോഗിലെ ഒരു പോസ്റ്റില്‍ ആവശ്യമുള്ള ചിത്രം അപ്‌ലോഡ് ചെയ്ത്, Edit Html എന്ന ടാബില്‍ ക്ലിക്ക് ചെയ്ത്, ചിത്രത്തിന്റെ URL ഇതിനായി ഉപയോഗിക്കാവുന്നതാണ്. ബ്ലോഗര്‍ - പിക്കാസ എന്നിവ ലിങ്ക് ചെയ്തിരിക്കുന്നതിനാല്‍, ഈ പോസ്റ്റ് സേവ് ചെയ്തില്ലായെങ്കിലും ചിത്രം ഡിലീറ്റാവില്ല. നിങ്ങളുടെ പിക്കാസ അക്കൌണ്ടില്‍, നിങ്ങളുടെ ബ്ലോഗിന്റെ പേരിലുള്ള ഒരു Unlisted ആല്‍ബത്തില്‍ ഈ ചിത്രം സേവ് ചെയ്യപ്പെടുന്നതിനാലാണ് ഇതു സാധ്യമാവുന്നത്.
3. തലക്കെട്ട്: ഈ വിഡ്‌ജറ്റ് ഉപയോഗിച്ചിരിക്കുന്നത് എന്റെ ഗ്രഹണം എന്ന ബ്ലോഗില്‍ കാണാവുന്നതാണ്. വിഡ്‌ജറ്റില്‍ My Blogs എന്നെഴുതിയിരിക്കുന്നതാണ് ഇവിടെ തലക്കെട്ട് എന്നതുകൊണ്ട് ഉദ്ദേശിക്കുന്നത്. നിങ്ങള്‍ക്കിഷ്ടമുള്ള ഒരു തലക്കെട്ട് ഇവിടെ നല്‍കാവുന്നതാണ്.

പ്രധാന ലിങ്കുകള്
ആദ്യമായി ബ്ലോഗര്‍ പ്രൊഫൈല്‍, പിക്കാസ ആല്‍ബം, ഓര്‍ക്കുട്ട് പ്രൊഫൈല്‍, യാഹൂ സ്റ്റാറ്റസ് എന്നിവയില്‍ വിഡ്‌ജറ്റില്‍ ദൃശ്യമാവേണ്ടവയെ സൂചിപ്പിക്കുന്ന ചെക്ക് ബോക്സ് മാത്രം ടിക്ക് ചെയ്യുക.
1. ബ്ലോഗര്‍ പ്രൊഫൈല്‍: നിങ്ങളുടെ ബ്ലോഗര്‍ പ്രൊഫൈല്‍ URL, ലിങ്ക് എന്ന ടെക്സ്റ്റ് ബോക്സില്‍ എന്റര്‍ ചെയ്യുക. ആവശ്യമുള്ള തലക്കെട്ടും നല്‍കുക.
2. പിക്കാസ ആല്‍ബം: പിക്കാസ ആല്‍ബം നിങ്ങള്‍ക്കുണ്ടെങ്കില്‍, ആല്‍ബത്തിലേക്കുള്ള ലിങ്കും, ഒരു തലക്കെട്ടും നല്‍കുക. ഇത് ഫ്ലിക്കര്‍ ആല്‍ബവുമാവാം, പക്ഷെ ഐക്കണ്‍ മാറില്ല എന്നുമാത്രം.
3. ഓര്‍ക്കുട്ട് പ്രൊഫൈല്‍: ഓര്‍ക്കുട്ടും ബ്ലോഗറും തമ്മില്‍ ഇന്റഗ്രേഷന്‍ ഇപ്പോള്‍ സാധ്യമാണ്. നിങ്ങളുടെ ബ്ലോഗുകള്‍ പ്രൊഫൈല്‍ പേജില്‍ ഫീഡുകളായി ചേര്‍ക്കാവുന്നതാണ്. ബ്ലോഗുകളില്‍ നിന്നും ഓര്‍ക്കുട്ട് പ്രൊഫൈലിലേക്ക് ലിങ്ക് ചെയ്യുന്നത്, എളുപ്പത്തില്‍ സംവേദനം സാധ്യമാക്കും. പ്രൊഫൈല്‍ ലിങ്കും, ആവശ്യമുള്ള തലക്കെട്ടും നല്‍കുക.
4. യാഹൂ സ്റ്റാറ്റസ്: യാഹൂ മെസഞ്ചറില്‍ നിങ്ങള്‍ ഓണ്‍‌ലൈനാണോ ഓഫ്‌ലൈനാണോ എന്ന് ഇവിടെ നോക്കിയാല്‍ പ്രേക്ഷകന് കാണുവാന്‍ സാധിക്കും. പ്രേക്ഷകന്‍ ഉപയോഗിക്കുന്ന കമ്പ്യൂട്ടറില്‍ യാഹൂ മെസഞ്ചര്‍ ഇന്‍സ്റ്റാള്‍ ചെയ്തിട്ടുണ്ട്ങ്കില്‍, ഇവിടെ മൌസമര്‍ത്തി ചാറ്റ് ആരംഭിക്കുവാനും കഴിയും. ഇവിടെ നിങ്ങളുടെ യൂസര്‍ നെയിമാണ് നല്‍കേണ്ടതെന്ന് ഓര്‍ക്കുക. yourname@yahoo.com എന്നാണ് നിങ്ങളുടെ യാഹൂ അഡ്രസെങ്കില്‍ yourname എന്നഭാഗം മാത്രം ഇവിടെ നല്‍കിയാല്‍ മതിയാവും. ആവശ്യമുള്ള തലക്കെട്ടും നല്‍കുക.

ഇത്രയും നല്‍കിക്കഴിഞ്ഞാല്‍ ‘തുടരുക’ എന്ന ബട്ടണ്‍ അമര്‍ത്തി അടുത്ത ഘട്ടത്തിലേക്ക് പോകാവുന്നതാണ്.
ബ്ലോഗ് ലിങ്കുകള്‍:
ഇവിടെയാണ് നിങ്ങളുടെ മറ്റ് ബ്ലോഗുകളുടെ ലിങ്ക് നല്‍കേണ്ടത്. പത്ത് ബ്ലോഗുകള്‍ എന്റര്‍ ചെയ്യുവാനുള്ള ഓപ്ഷന്‍ ലഭ്യമാണ്. ഓരോ ലിങ്കിനേയും സൂചിപ്പിക്കുന്ന ചെക്ക് ബോക്സ് സെലക്ട് ചെയ്തതിനു ശേഷം, ഓരോന്നിന്റേയും പേരും ലിങ്കും നല്‍കുക.‍ ഇവിടെ പേരും ലിങ്കും നല്‍കുമ്പോള്‍ വിട്ടുവിട്ട് നല്‍കാതിരിക്കുവാന്‍ ശ്രദ്ധിക്കുക. അതായത് 1 നല്‍കി, 2 നല്‍കാതെ 3 നല്‍കുക. ഈ രീതിയില്‍ എന്റര്‍ ചെയ്താല്‍, കോഡ് ശരിയായി പ്രവര്‍ത്തിക്കില്ല. അതുപോലെ നാലു ബ്ലോഗുകളേ നല്‍കുന്നുള്ളൂവെങ്കില്‍ വി‌ഡ്‌ജറ്റിലെ സ്ക്രോള്‍ ബട്ടണുകള് ഉപയോഗിക്കുവാന്‍ കഴിയുകയില്ല. അഞ്ച് അല്ലെങ്കില്‍ അതില്‍ കൂടുതല്‍ ബ്ലോഗുകള്‍ ഇതിന് ആവശ്യമുണ്ട്.

വിഡ്‌ജറ്റ് ബ്ലോഗില്‍ ചേര്‍ക്കുവാന്‍:
ആവശ്യമുള്ള ബ്ലോഗ് ലിങ്കുകള്‍ സെലക്ട് ചെയ്ത്, ‘തുടരുക’ എന്ന ബട്ടണ്‍ അമര്‍ത്തിയാല്‍ നിങ്ങള്‍ക്കാവശ്യമുള്ള കോഡ് ദൃശ്യമാവും. കോഡിനുള്ളില്‍ എവിടെയെങ്കിലും മൌസ് ക്ലിക്ക് ചെയ്ത്, Alt + A കീ ബോര്‍ഡിലമര്‍ത്തി മുഴുവനായി സെലക്ട് ചെയ്ത്, വീണ്ടും കീ ബോര്‍ഡില്‍ Ctrl + C അമര്‍ത്തി കോഡ് മുഴുവനായും കോപ്പി ചെയ്യുക. ഇനിയും ഈ വിഡ്‌ജറ്റ് ചേര്‍ക്കേണ്ട ബ്ലോഗിന്റെ ഡാഷ്‌ബോര്‍ഡില്‍ നിന്നും Settings > Template സെലക്ട് ചെയ്യുക. ഉപയോഗിക്കുവാന്‍ താത്പര്യമുള്ള ഭാഗത്തുള്ള Add a Page Element ഓപ്ഷനില്‍ ക്ലിക്ക് ചെയ്യുക. തുറന്നുവരുന്ന വിന്‍ഡോയില്‍ HTML/JavaScript എന്ന ഐറ്റം സെലക്ട് ചെയ്യുക. അവിടെ കോപ്പി ചെയ്ത കോഡ് പേസ്റ്റ് ചെയ്യുക.ശേഷം Save Changes അമര്‍ത്തുക. ഇപ്പോള്‍ ഈ വിഡ്‌ജറ്റ് നിങ്ങളുടെ ബ്ലോഗില്‍ ചേര്‍ക്കപ്പെട്ടുകഴിഞ്ഞു. മുകളില്‍ ലഭ്യമായ View Blog ലിങ്ക് ഉപയോഗിച്ച് ബ്ലോഗിന്റെ പൂമുഖത്തെത്താവുന്നതാണ്.

കോഡ് കോപ്പി ചെയ്ത ശേഷം, സാങ്കേതികത്തിലെ പേജില്‍ നിന്നും പോവാതിരിക്കുവാന്‍ ശ്രദ്ധിക്കുക. ബ്ലോഗില്‍ ചേര്‍ത്തതിനു ശേഷം മാറ്റങ്ങള്‍ ആവശ്യമെങ്കില്‍ കോഡ് ജനറേറ്ററില്‍ ലഭ്യമായ ‘മടങ്ങുക’ എന്ന ബട്ടണ്‍ ഉപയോഗിക്കാവുന്നതാണ്. മാറ്റം വരുത്തിയ കോഡ് പിന്നെയും HTML/JavaScript ഐറ്റം എഡിറ്റ് ചെയ്ത് നല്‍കണമെന്നു മാത്രം. മലയാളം ഫോണ്ട് വി‌ഡ്‌ജറ്റ് അല്ലെങ്കില്‍ മറ്റേതെങ്കിലും HTML/JavaScript വിഡ്‌ജറ്റ് ഉപയോഗിക്കുന്നെങ്കില്‍ അതേ വിന്‍ഡോയില്‍ തന്നെ ഈ കോഡ് ചേര്‍ത്താലും മതിയാവും.

കുറിപ്പ്: വിഡ്‌ജറ്റിലോ, കോഡ് ജനറേറ്ററിലോ എന്തെങ്കിലും പ്രശ്നങ്ങള്‍ ഉണ്ടെങ്കില്‍ ഇവിടെ കമന്റായി ചൂണ്ടിക്കാട്ടുവാന്‍ അഭ്യര്‍ത്ഥിക്കുന്നു.
--

Post a Comment

Keywords: Blogger, Widget, Profile, Links, Yahoo! Messenger Status, My Blogs, Blogger, Orkut, Picasa Album, Flash
--

ക്യാമറയോടു കൂടിയ മൊബൈല്‍ ഫോണുകള്‍ ഇന്ന് സര്‍വ്വസാധാരണമാണ്. 2 മുതല്‍ 5 മെഗാപിക്സല്‍ വരെയുള്ള ക്യാമറകളാണ് ഒട്ടുമിക്ക മിഡില്‍ റേഞ്ച് മൊബൈല്‍ ഫോണുകളിലും അടങ്ങിയിരിക്കുന്നത്. ഈ ക്യാമറകളില്‍ എടുത്ത ഫോട്ടോകള്‍ വെബ്ബ് ഉപയോഗങ്ങള്‍ക്കും, പോസ്റ്റ്കാര്‍ഡ് വലുപ്പത്തില്‍ വളരെ മോശമല്ലാത്ത രീതിയില്‍ ചിത്രങ്ങള്‍ പ്രിന്റ് ചെയ്യുവാനും അനുയോജ്യമാണ്. എന്നാല്‍ പലപ്പോഴും ഉപയോഗിക്കുന്നതിലെ പിഴവുകള്‍ മൂലം ഇവയിലെടുക്കുന്ന ചിത്രങ്ങള്‍ വളരെ നിലവാരം കുറഞ്ഞവയാവാറുണ്ട്. മൊബൈല്‍ ഫോണ്‍ ക്യാമറകള്‍ ഉപയോഗിച്ച് ചിത്രങ്ങളെടുക്കുമ്പോള്‍ ശ്രദ്ധിക്കേണ്ട ചില അടിസ്ഥാനകാര്യങ്ങളാണ് ഇവിടെ പ്രതിപാദിച്ചിരിക്കുന്നത്.

► എങ്ങിനെ പിടിക്കണം?
മൊബൈല്‍ ഫോണുകള്‍ വളരെ ഭാരം കുറഞ്ഞവയായതിനാല്‍ ഒരു കൈകൊണ്ട് പിടിച്ചുതന്നെ ഫോട്ടോയെടുക്കുവാന്‍ സാധ്യമാണ്. എന്നിരിക്കിലും ഈ രീതിയില്‍ ചിത്രങ്ങളെടുക്കുമ്പോള്‍ മൊബൈല്‍ ഷേക്ക് ചെയ്യുവാനുള്ള സാധ്യത വളരെക്കൂടുതലാണ്. ഇതുമൂലം പലപ്പോഴും മങ്ങിയ ചിത്രങ്ങളാ‍വും നമുക്കു ലഭിക്കുക. രണ്ടുകൈകൊണ്ടും വളരെ ദൃഢമായി പിടിച്ച് ഫോട്ടൊയെടുക്കുന്നതാണ് എപ്പോഴും നല്ലത്. അതുപോലെ, കൈ രണ്ടും മുഴുവന്‍ നീട്ടി, മൊബൈല്‍ ശരീരത്തില്‍ നിന്നും വളരെ അകറ്റി പിടിച്ച് എടുക്കുന്നതും ഒഴിവാക്കുക. കഴിയുന്നതും ശരീരത്തോട് ചേര്‍ന്ന്, എന്നാല്‍ സ്ക്രീനില്‍ ദൃശ്യം കാണാവുന്ന രീതിയില്‍, പിടിച്ച് ഫോട്ടോയെടുക്കുക. കൈ ഏതെങ്കിലും നിശ്ചലമായ വസ്തുവിന്റെ (ഉദാ: അരമതില്‍, കസേരക്കൈ) മുകളിലൂന്നുന്നതും ഷാര്‍പ്പ് ആയ ചിത്രം ലഭിക്കുവാന്‍ സഹായിക്കും.

► എങ്ങിനെ ചിത്രം എടുക്കണം?
മൊബൈല്‍ ശരിയായി പിടിക്കുന്നതുപോലെ തന്നെ പ്രാധാന്യമുള്ളതാണ് എങ്ങിനെ ഫോട്ടോ എടുക്കണമെന്നതും. എടുക്കേണ്ട പ്രധാന സബ്ജക്ട് തീരുമാനിച്ച് ഫ്രയിമില്‍ ആക്കിക്കഴിഞ്ഞാല്‍ ഫോട്ടോ എടുക്കാവുന്നതാണ്. ഷട്ടര്‍ തുറന്നടയുന്ന സമയം ക്യാമറ ഒട്ടും അനങ്ങാതിരിക്കുവാന്‍ ശ്രദ്ധിക്കുക. ബട്ടണ്‍ അമര്‍ത്തുന്ന സമയമല്ല ഡിജിറ്റല്‍ ക്യാമറകളില്‍ ചിത്രം പതിയുന്നത്, ഒരു ചെറിയ ഇടവേളയ്ക്ക് ശേഷമാണ് എന്നതും ഓര്‍മ്മയിരിക്കുക. അതിനാല്‍ തന്നെ ക്ലിക്ക് ചെയ്ത് വിടുമ്പോളുണ്ടാവുന്ന ഷേക്ക് ചിത്രത്തെ ബാധിക്കാവുന്നതാണ്. അതിനാല്‍, ക്ലിക്ക് ചെയ്ത്, ചിത്രം സേവ് ചെയ്തതിനു ശേഷം മാത്രം ക്ലിക്ക് വിടുക. ഈ രീതിയില്‍ എടുക്കുമ്പോള്‍, ഫോട്ടോ ബ്ലര്‍ ആകുവാനുള്ള സാധ്യത വളരെക്കുറവാണ്. ചലിച്ചുകൊണ്ടിരിക്കുന്ന ചിത്രമാണ് എടുക്കേണ്ടതെങ്കില്‍, മൊബൈല്‍ ക്യാമറ വസ്തുവിന്റെ ചലനത്തിന് അനുസൃതമായി ചലിപ്പിച്ച് എടുക്കുന്നതാവും കൂടുതല്‍ നല്ലത്.

► എങ്ങിനെ ഒബ്ജക്ടിനെ ഫ്രയിമിലാക്കണം?
ഒരു ഓബ്ജക്ടിനെ എങ്ങിനെ ഫ്രയിമിലാക്കണമെന്നുള്ളത് ഫോട്ടോഗ്രാഫറുടെ മനോധര്‍മ്മമാണ്. എന്നിരുന്നാലും മൊബൈല്‍ ക്യാമറ ഉപയോഗിക്കുമ്പോള്‍ ചില കാര്യങ്ങള്‍ ശ്രദ്ധിക്കുക.

• ഡിജിറ്റല്‍ സൂം ഉപയോഗിക്കാതിരിക്കുക: ഓബ്ജക്ടിനെ കൂടുതല്‍ അടുത്ത് കണ്ട് ഫോട്ടോയെടുക്കുവാന്‍ നമ്മള്‍ പ്രേരിക്കപ്പെടുമെങ്കിലും ഡിജിറ്റല്‍ സൂം ഉപയോഗിക്കുന്നത് പൂര്‍ണ്ണമായും ഒഴിവാക്കുക. ഡിജിറ്റല്‍ സൂം ചെയ്യുന്നത്, സെന്‍സറില്‍ പതിയുന്ന പിക്സലുകള്‍ വലുതാക്കുക എന്നതുമാത്രമാണ്. അത് പിന്നീട് ഫോട്ടോഷോപ്പ്, ജിം‌പ് മുതലായ ഫോട്ടോ എഡിറ്റിംഗ് സോഫ്റ്റ്‌വെയറുകളില്‍ സാധ്യമാവുന്നതാണ്.
• ശരിയായ ഫോര്‍മാറ്റ് തിരഞ്ഞെടുക്കുക: പ്രിന്റ്/വെബ് ഉപയോഗങ്ങള്‍ക്കായാണ് ഈ ചിത്രങ്ങളെങ്കില്‍ ലഭ്യമായവയില്‍ ഏറ്റവും കൂടിയ റെസല്യൂഷന്‍ തന്നെ തിരഞ്ഞെടുക്കുക. കാളര്‍ ഐഡി ഉപയോഗത്തിനും മറ്റുമാണെങ്കില്‍, ഏറ്റവും ചെറിയ റെസല്യൂഷന്‍ മതിയാവും.
• ഓബജക്ടിനെ അടുത്തു കാണുക: ഓബ്ജക്ടിന്റെ പരമാവധി അടുത്തു ചെന്ന് ഓബ്ജക്ടിനെ ഫ്രയിമില്‍ കൊള്ളിക്കുക. കാലുകള്‍ കൊണ്ടുള്ള ഈ സൂമിംഗ് ചിത്രത്തിന്റെ ക്വാളിറ്റി കൂട്ടുന്നതിന് വളരെ സഹായിക്കും.
• ആട്ടോ ഫോക്കസ്: ചില മൊബൈല്‍ ക്യാമറകളില്‍ (സോണി എറിക്സണ്‍ K750i) ആട്ടോ ഫോക്കസ് ഓപ്ഷന്‍ ലഭ്യമായിരിക്കും. ക്യാമറ ബട്ടണ്‍ പകുതി അമര്‍ത്തുമ്പോള്‍ ഓബ്ജക്ടിനെ ക്യാമറ ആട്ടോമാറ്റിക്കായി ഫോക്കസ് ചെയ്യും. ഈ രീതിയില്‍ ആവശ്യമുള്ള ഓബ്ജക്ടിനെ ഫോക്കസ് ചെയ്ത ശേഷം ബട്ടണ്‍ മുഴുവന്‍ അമര്‍ത്തി ഷൂട്ടിംഗ് പൂര്‍ത്തിയാക്കുക. ഒന്നില്‍ കൂടുതല്‍ ഓബ്ജക്ടുകള്‍ ഉള്ള ഫ്രയിമുകളില്‍ ഈ രീതിയില്‍ പ്രാധാന്യമുള്ള ഓബ്ജക്ടിനെ തിരഞ്ഞെടുത്ത് ഫോക്കസ് ചെയ്യാവുന്നതാണ്.

► എപ്പോള്‍ എടുക്കണം?
എല്ലാ സമയങ്ങളിലും മൊബൈല്‍ ഫോണിലെ ക്യാമറ നല്ല ചിത്രങ്ങള്‍ നല്‍കണമെന്നില്ല. വളരെ നിലവാരം കുറഞ്ഞ ലെന്‍സ്, സെന്‍സര്‍ എന്നിവയാണ് ഇവയില്‍ അടങ്ങിയിരിക്കുന്നത്. അതിനാല്‍ തന്നെ ഏറ്റവും അനുയോജ്യമായ സമയം ചിത്രം എടുക്കുന്നതിനായി തിരഞ്ഞെടുക്കേണ്ടതുണ്ട്. ചില നിര്‍ദ്ദേശങ്ങള്‍:

• വെളിച്ചം: നല്ല രീതിയില്‍ വെളിച്ചമുണ്ടെങ്കില്‍, മൊബൈല്‍ ഫോണ്‍ ക്യാമറയിലെടുക്കുന്ന ചിത്രങ്ങള്‍ കൂടുതല്‍ നന്നായിരിക്കും. മൊബൈല്‍ ക്യാമറകളിലെ ഫ്ലാഷ് പലപ്പോഴും ഉപയോഗപ്രദമാവാറില്ല. പകല്‍ സമയം, നല്ല തെളിച്ചമുള്ള അവസ്ഥയില്‍ ഫോട്ടോയെടുക്കുന്നതാണ് ഏറ്റവും നല്ലത്.
• ബ്രൈറ്റ്നസ്/എക്സ്പോഷര്‍: ഇപ്പോഴുള്ള മിക്ക മൊബൈല്‍ ക്യാമറകളിലും ബ്രൈറ്റ്നസ്/എക്സ്പോഷര്‍ ക്രമീകരിക്കുവാനുള്ള ഓപ്ഷനുകള്‍ ലഭ്യമായിരിക്കും. ഇവ ഉപയോഗിച്ച് നോക്കുക.
• മോഡുകള്‍: ഇന്ന് ലഭ്യമായ പല മൊബൈല്‍ ക്യാമറകളിലും മാക്രോ, നൈറ്റ് തുടങ്ങിയ മോഡുകള്‍ ലഭ്യമായിരിക്കും. നൈറ്റ് മോഡിന് പ്രത്യേകിച്ച് വിശദീകരണം ആവശ്യമില്ല. മാക്രോ മോഡ് എന്നാല്‍ ഓബ്ജക്ടിനെ 1:1 അനുപാതത്തില്‍ പകര്‍ത്തുവാന്‍ ഉപയോഗിക്കുന്ന മോഡാണ്. ഓബ്ജക്ടിനോട് ഏറ്റവും അടുത്ത് ക്യാമറ പിടിച്ച് ഈ മോഡില്‍ ചിത്രങ്ങള്‍ എടുക്കുവാന്‍ സാധിക്കും. എത്രമാത്രം അടുത്തെന്നത് ക്യാമറയുടെ ലെന്‍സിനെ അനുസരിച്ചിരിക്കും. ലഭ്യമായ വിവിധ മോഡുകള്‍ ഉപയോഗിച്ചും പരീക്ഷണങ്ങള്‍ നടത്തുക.
• വെറ്റ് ബാലന്‍സ്: പല വെളിച്ചങ്ങള്‍ക്കനുസൃതമായി, റഫറന്‍സായ വെളുപ്പ് നിറത്തിന് വ്യത്യാസമുണ്ടാവും. ഇത് ഓബ്ജക്ടിന്റെ ശരിയായ നിറം ക്യാമറയില്‍ പതിയാതിരിക്കുന്നതിന് കാരണമാവുന്നു. മൊബൈല്‍ ഫോണ്‍ ക്യാമറകളീല്‍, മാന്വലായി വെറ്റ് ബാലന്‍സ് സെറ്റ് ചെയ്യുവാനുള്ള ഓപ്ഷന്‍ കാണുകയില്ലെങ്കിലും, വിവിധ സാഹചര്യങ്ങളില്‍ ഉപയോഗിക്കുവാനായി ഇന്‍ബില്‍റ്റ് സെറ്റിംഗുകള്‍ ലഭ്യമായിരിക്കും. അവയും ഉപയോഗിച്ചു ശീലിക്കുക.
• എഫക്ടുകള്‍ ഒഴിവാക്കുക: മൊബൈല്‍ ഫോണുകളില്‍ സേപിയ, ബ്ലാക്ക് & വൈറ്റ് തൂടങ്ങിയ ഇന്‍ബില്‍റ്റ് ഇഫക്ടുകള്‍ ലഭ്യമായിരിക്കും. കഴിയുന്നതും ഇവ ഉപയോഗിക്കാതിരിക്കുക. ഇവയൊക്കെയും പിന്നീട് സോഫ്റ്റ്‌വെയറുകള്‍ ഉപയോഗിച്ച് സാധ്യമാണ്.
• നോര്‍മ്മല്‍ / ഫൈന്‍ മോഡുകള്‍: ചില മൊബൈല്‍ ക്യാമറകളില്‍ നോര്‍മ്മല്‍/ഫൈന്‍ മോഡുകള്‍ ലഭ്യമായിരിക്കും. ഫൈന്‍ മോഡിലെടുക്കുന്ന ചിത്രങ്ങള്‍ കൂടുതല്‍ മെമ്മറി സൂക്ഷിക്കപ്പെടുവാ‍നായി ഉപയോഗിക്കും. എന്നിരുന്നാലും ഈ മോഡിലുള്ള ചിത്രങ്ങള്‍ക്കാവും കൂടുതല്‍ വ്യക്തത.
  
• ലെന്‍സ് വൃത്തിയായി സൂക്ഷിക്കുക: ചില മൊബൈല്‍ ക്യാമറകളില്‍ ലെന്‍സിന് മൂടിയുണ്ടാ‍വാറില്ല. ചിത്രമെടുക്കുന്നതിനു മുന്‍പായി ലെന്‍സിന്റെ പുറം ഭാഗത്ത് പൊടിയോ മറ്റ് അഴുക്കുകളോ ഇല്ല എന്നുറപ്പുവരുത്തുക.

► എങ്ങിനെ ചിത്രങ്ങള്‍ സൂക്ഷിക്കണം?
ഗൂഗിള്‍ പിക്കാസ, അഡോബി ഫോട്ടോഷോപ്പ് എലിമന്റ്സ്, ആപ്പിള്‍ അപ്പേര്‍ച്ചര്‍ തുടങ്ങി, പോസ്റ്റ് പ്രൊഡക്ഷന്‍ ഉപയോഗിക്കാവുന്ന ധാരാളം ടൂളുകള്‍ ഇന്ന് ലഭ്യമാണ്. ഇതില്‍ ഗൂഗിള്‍ പിക്കാസ സൌജന്യമായി ഉപയോഗിക്കാവുന്നതാണ്. ഇവയേതെങ്കിലുമുപയോഗിച്ച്, മൊബൈല്‍ ഫോണ്‍ മെമ്മറിയില്‍ നിന്നും ചിത്രങ്ങള്‍ കമ്പ്യൂട്ടറിലേക്ക് സേവ് ചെയ്യുന്നതാണ് ഉചിതം. പ്രത്യേകം ഫോള്‍ഡറുകളിലായി, കീ-വേഡുകള്‍, ഡിസ്ക്രിപ്ഷന്‍ എന്നിവ ചേര്‍ത്ത് ചിത്രങ്ങള്‍ സേവ് ചെയ്യുവാന്‍ ഇതിലൂടെ സാധിക്കുന്നു. ചിത്രമെടുക്കുമ്പോള്‍ ഒരു ചിത്രം തന്നെ ഒന്നില്‍ കൂടുതല്‍ തവണ, ആവശ്യമെങ്കില്‍ വിവിധ സെറ്റിംഗുകളില്‍, എടുക്കുന്നത് നന്നായിരിക്കും. ഇത് ഒരു ചിത്രമെങ്കിലും ശരിയായി കിട്ടുവാനുള്ള സാധ്യത വര്‍ദ്ധിപ്പിക്കുന്നു.

അവസാനമായി എപ്പോഴും മൊബൈല്‍ ഫോണിലുള്ള ക്യാമറ നല്ല രീതിയില്‍ ഉപയോഗിക്കുക. വ്യക്തികളുടെ ഫോട്ടോ എടുക്കുമ്പോഴും മറ്റും അവരോട് അനുവാദം വാങ്ങിയ ശേഷം മാത്രം എടുക്കുക. ചിത്രങ്ങള്‍ കൂ‍ടുതല്‍ മികച്ചതാക്കുവാന്‍ മറ്റെന്തെങ്കിലും നിര്‍ദ്ദേശങ്ങള്‍ ഇനിയുമുണ്ടെങ്കില്‍, അതിവിടെ കമന്റായി ഇടുവാന്‍ താത്പര്യപ്പെടുന്നു.

എന്റെ ചില മൊബൈല്‍ ഫോണ്‍ ക്യാമറ (സോണി എറിക്സണ്‍ W700i) പരീക്ഷണങ്ങള്‍:
• നടുമുറ്റം
• അറിയാതെ മമ
• കടല്‍പ്പാലം
• മങ്ങി മയങ്ങി
• സര്‍പ്പക്കാവ്‌
--

(2007 ജൂണ്‍ 29, ജൂലൈ 6 തീയതികളിലായി ഇൻഫോമാധ്യമം സപ്ലിമെന്റിൽ പ്രസിദ്ധീകരിച്ചത്.)

Post a Comment

Keywords: Photography, Tips, How to, Mobile, Phone, Camera, Camera Phone, Photo, Shoot