പിക്സല്‍ ഗ്രാഫിക് എഡിറ്റിംഗ് ആവശ്യങ്ങള്‍ക്ക് ഫോട്ടോഷോപ്പ് ഉപയോഗിക്കാമെന്ന് നമുക്കേവര്‍ക്കുമറിയാം. എന്നാല്‍ ചിത്രപ്പണികള്‍ക്കല്ലാതെ, നാം പേപ്പറില്‍ വരച്ച ഒരു ചിത്രത്തിന്; അല്ലെങ്കില്‍ കോറല്‍ ഡ്രോ, ഇല്ലുസ്ട്രേറ്റര്‍, ഫ്ലാഷ് മുതലായവയില്‍ വരച്ചുണ്ടാക്കിയ ഒരു ചിത്രത്തിന് നിറം നല്‍കുവാനും ഫോട്ടോഷോപ്പ് ഉപയോഗിക്കാവുന്നതാണ്. പേപ്പറില്‍ വരച്ച ചിത്രമാണെങ്കില്‍ ആദ്യമതിനെ സ്കാന്‍ ചെയ്ത് ഫോട്ടോഷോപ്പില്‍ തുറക്കേണ്ടതുണ്ട്. പ്രധാനമെനുവില്‍ File > Import എന്ന വിഭാഗത്തില്‍ നിന്നും കമ്പ്യൂട്ടറില്‍ ലഭ്യമായ സ്കാനര്‍ സെലക്ട് ചെയ്യുക. സ്കാനിംഗ് ഓപ്ഷനുകള്‍ ലഭ്യമായ ജാലകം നമുക്ക് ലഭ്യമാവും. സ്കാനിംഗ് പൂര്‍ത്തിയാവുമ്പോള്‍, സ്കാന്‍ ചെയ്ത ചിത്രം ഫോട്ടോഷോപ്പില്‍ തുറക്കപ്പെടും.
ചിത്രങ്ങള്‍ക്ക് നിറം നല്‍കുന്നതിനു മുന്‍പായി, ഫോട്ടോഷോപ്പിലെ ചാനലുകളെക്കുറിച്ച് അറിഞ്ഞിരിക്കേണ്ടതുണ്ട്. RGB, CMYK എന്നിങ്ങനെ വിവിധ ഇമേജ് മോഡുകള്‍ ഉള്ളതായി നമുക്കറിയാം. RGB കളര്‍ മോഡിലുള്ള ഒരു ചിത്രത്തിന് Red, Green, Blue എന്നിങ്ങനെ മൂന്ന് ചാനലുകള്‍ ലഭ്യമായിരിക്കും. ഫോട്ടോഷോപ്പില്‍ RGB മോഡിലുള്ള ഒരു ചിത്രം തുറന്നതിനു ശേഷം, പ്രധാനമെനുവില്‍ നിന്നും Window > Channels സെലക്ട് ചെയ്യുക. ലഭ്യമാവുന്ന ചാനല്‍ പാലെറ്റില്‍ RGB, Red, Green, Blue എന്നിങ്ങനെ നാല് ചാനലുകള്‍ കാണുവാന്‍ സാധിക്കും. RGB എന്ന ചാനല്‍ സൌകര്യത്തിനു വേണ്ടി ചേര്‍ത്തിരിക്കുന്നു എന്നതേയുള്ളൂ, മറ്റ് മൂന്ന് ചാനലുകളും ഒരുമിച്ച് സെലക്ട് ചെയ്യുക എന്നതാണ് ഇതുകൊണ്ട് അര്‍ത്ഥമാക്കുന്നത്.
ഓരോ ചാനലുകളും അതാത് നിറത്തിന്റെ ഗ്രേ-സ്കെയില്‍ ടോണ്‍ വിലകളാണ് പ്രതിനിധാനം ചെയ്യുന്നത്. അതായത് 0 മുതല്‍ 255 വരെയുള്ള ചുവപ്പുനിറത്തിന്റെ വിവിധ ടോണുകളാണ് Red ചാനല്‍ കാണിക്കുന്നത്. ഈ രീതിയില് മൂന്നു നിറങ്ങളുടേയും വിവിധ ടോണ്‍ വിലകളുടെ സങ്കരമാണ് ബഹുവര്‍ണ്ണ ചിത്രമായി നമുക്കു മുന്നില്‍ തെളിയുന്നത്. ഒരു ഉദാഹരണം നോക്കുക.
മൂന്നു ചാനലുകളും ചിത്രം 1-ല്‍ ദൃശ്യമാണ്. താഴെ ഇടതു ഭാഗത്തു കാണുന്ന മൂന്നു ചതുരക്കട്ടകള്‍ Red (255, 0, 0), Green (0, 255, 0), Blue (0, 0, 255) എന്ന ക്രമത്തില്‍ ഓരോ നിറത്തെ സൂചിപ്പിക്കുന്നു. ചിത്രം 2-ല്‍ Red ചാനല്‍ മാത്രമായി ദൃശ്യമാക്കിയിരിക്കുന്നു. ചതുരക്കട്ടകളില്‍ ആദ്യത്തേത് പൂര്‍ണ്ണമായി വെളുത്ത നിറത്തിലും, മറ്റു രണ്ടും പൂര്‍ണ്ണമായി കറുത്ത നിറത്തിലും കാണാവുന്നതാണ്. ചുവപ്പ് നിറം ആദ്യത്തെ ചതുരത്തില്‍ അടങ്ങിയിരിക്കുന്നു, മറ്റു രണ്ടിലും ചുവപ്പിന്റെ ഒരു ടോണും ലഭ്യമല്ല എന്നാണ് ഇത് സൂചിപ്പിക്കുന്നത്. ചുവപ്പിന്റെ വിവിധ ടോണുകള്‍ അടങ്ങുന്ന ചിത്രത്തിന്റെ ഭാഗങ്ങള്‍ മാത്രമാണ് രണ്ടില്‍ കാണുവാന്‍ സാധിക്കുന്നത്. ഇപ്രകാരം പച്ച, നീല എന്നീ ചാനലുകള്‍ മാത്രമായി കാണിക്കുന്ന 3, 4 ചിത്രങ്ങളും ശ്രദ്ധിക്കുക.
ഇവ കൂടാതെ പുതിയതായി ചാനലുകള്‍ ചേര്‍ക്കുവാനും ഫോട്ടോഷോപ്പില്‍ സാധ്യതയുണ്ട്. ഈ ചാനലുകള്‍ ചിത്രത്തിലേക്ക് എന്തെങ്കിലും ചേര്‍ക്കുന്നില്ല മറിച്ച് ഒരു മാസ്ക് ലെയ‌റിന് സമാനമായ രീതിയില് പ്രവര്‍ത്തിക്കുകയാണ് ചെയ്യുന്നത്. പുതുതായി ചേര്‍ക്കുന്ന ചാനലുകളെ Alpha ചാനലുകള്‍ എന്നാണ് സൂചിപ്പിക്കുന്നത്. പ്രധാനമായും സെലക്ഷനുകള്‍ സേവ് ചെയ്യുവാനാണ് ആല്‍ഫാ ചാനലുകള്‍ ഉപകരിക്കുന്നത്. ഉദാഹരണത്തിന് മുകളില്‍ കാണുന്ന ചിത്രത്തിന്റെ റെഡ് ചാനല്‍ കോപ്പി ചെയ്യുക. (ലെയറുകള്‍ കോപ്പി ചെയ്യുന്ന രീതിയില്, റെഡ് ചാനല്‍ ഡ്രാഗ് ചെയ്ത് ചാനല്‍ പാലെറ്റിന്റെ താഴെ-വലത് ഭാഗത്ത് ലഭ്യമായിരിക്കുന്ന Create new channel ഐക്കണില്‍ ഡ്രോപ്പ് ചെയ്താല്‍ മതിയാവും.) Red copy എന്നൊരു പുതിയ ചാനല്‍ നമുക്ക് ലഭിക്കും. പ്രധാനമെനുവില്‍ Select > Load Selection... എന്ന ഇനം തിരഞ്ഞെടുക്കുക. തുറന്നു വരുന്ന ഡയലോഗ് ബോക്സില്‍ Channel: എന്ന കോംബോ ബോക്സിന്റെ വിലയായി Red copy സെലക്ട് ചെയ്യുക. OK ബട്ടണ്‍ അമര്‍ത്തുമ്പോള്‍ ചുവപ്പിന്റെ സാന്ദ്രതയ്ക്ക് അനുസൃതമായി ഒരു സെലക്ഷന്‍ ദൃശ്യമാവുന്നതാണ്. ചിത്രം ശ്രദ്ധിക്കുക.
അഡോബി ഫ്ലാഷില്‍ വരച്ചുണ്ടാക്കിയ ഒരു സാന്റാ ക്ലോസിന്റെ ചിത്രത്തിനാണ് ഇവിടെ നിറം നല്‍കുവാന്‍ പോവുന്നത്. ചിത്രം ഫോട്ടോഷോപ്പില്‍ തുറക്കുക. ഇമേജ് മോഡ് RGB ആണെന്ന് ഉറപ്പുവരുത്തുക. (പ്രധാനമെനുവില്‍ Image > Mode) ലെയേഴ്സ് പാലെറ്റില്‍ ലഭ്യമായ Background എന്ന ലെയറില് ഡബിള്‍ ക്ലിക്ക് ചെയ്ത് അതിനെ ഒരു സാധാരണ ലെയ‌റാക്കി മാറ്റുക. ഈ ലെയറിനെ നമുക്ക് Santa എന്നു വിളിക്കാം. ചാനത്സ് പാലെറ്റ് തുറക്കുക. കറുത്ത ഔട്ട്‌ലൈന്‍ ആയതിനാല്‍ എല്ലാ ചാനലുകളിലും ചിത്രം ലഭ്യമായിരിക്കും. എതെങ്കിലുമൊരു ചാനല്‍ കോപ്പി ചെയ്യുക. Blue copy എന്ന ഒരു പുതിയ ചാനലാണ് ഇവിടെ ഉണ്ടാക്കിയത്. തുടര്‍ന്ന് ഈ ചാനല്‍ ഇന്‍‌വേര്‍ട്ട് (Ctrl + I അമര്‍ത്തുക) ചെയ്യുക. Blue copy എന്ന ചാനല്‍ ഇപ്പോള്‍ ഒരു ഫിലിം നെഗറ്റീവിനു സമാനമായ രീതിയിലാവും കാണപ്പെടുക. ഇവിടെ ചാനല്‍ ഇന്‍‌വേര്‍ട്ട് ചെയ്യണമെന്ന് നിര്‍ബന്ധമില്ല. പകരം അടുത്ത ഘട്ടത്തില്‍ Load Selection... ഉപയോഗിച്ച്, ലഭ്യമാവുന്ന സെലക്ഷന്‍ ഇന്‍‌വേര്‍ട്ട് ചെയ്താലും മതിയാവും.
ലെയേഴ്സ് പാലെറ്റിലേക്ക് മടങ്ങിയെത്തുക. Santa എന്ന ലെയര്‍ നമുക്ക് പൂര്‍ണ്ണമായും ഗ്രേ (R: 153, G: 153, B: 153) നിറമാക്കാം (ഗ്രേ ഫോര്‍‌ഗ്രണ്ട് നിറമായി സെലക്ട് ചെയ്ത ശേഷം Alt + Del അമര്‍ത്തുക). പുതിയൊരു ലെയര്‍ ചേര്‍ക്കുക. ഇതിനെ നമുക്ക് Strokes എന്നു വിളിക്കാം. പ്രധാനമെനുവില്‍ Select > Load Selection... സെലക്ട് ചെയ്യുക. തുറന്നു വരുന്ന ഡയലോഗ് ബോക്സില്‍ Channel: എന്നതിന്റെ വിലയായി Blue copy സെലക്ട് ചെയ്യുക. ഫോര്ഗ്രൌണ്ട് നിറമായി കറുപ്പ് സെലക്ട് ചെയ്തതിനു ശേഷം, Alt + Del അമര്‍ത്തി സെലക്ഷനുള്ളില്‍ ഫില്‍ ചെയ്യുക. ഇപ്പോള്‍ സ്ട്രോക്ക് മാത്രമായി ഒരു ലെയര്‍ നമുക്ക് ലഭ്യമാവും.
മറ്റൊരു ലെയര്‍ കൂടി ലെയേഴ്സ് പാലെറ്റിലേക്ക് ചേര്‍ക്കുക. ഇതിനെ നമുക്ക് Fills എന്നു വിളിക്കാം. Strokes ലെയറില് മാജിക് വാന്‍ഡ് ടൂള്‍ ഉപയോഗിച്ച് ഓരോ ഭാഗവും പ്രത്യേകം സെലക്ട് ചെയ്തതിനു ശേഷം, Fills ലെയറില് കളര്‍ ഫില്‍ ചെയ്യുക. സോളിഡ് കളറുകളാണ് ഇപ്രകാരം ചെയ്യുവാനായി ഉപയോഗിക്കേണ്ടത്. എല്ലാ ഭാഗത്തും നിറം നല്‍കിയതിനു ശേഷം Strokes എന്ന ലെയറിനെ ഏറ്റവും മുകളിലായി അടുക്കുക.
ഫില്‍ എന്ന ലെയര്‍ പൂര്‍ണ്ണമായും കോപ്പി ചെയ്ത് (Ctrl + A അമര്‍ത്തി ചിത്രം മുഴുവനായി സെലക്ട് ചെയ്യുക, Ctrl + C അമര്‍ത്തി കോപ്പി ചെയ്യുക); ചാനത്സ് പാലെറ്റിലെത്തി, അവിടെ പുതുതായി ഒരു ചാനല്‍ ചേര്‍ത്ത് (Create new channel ഐക്കണില്‍ ക്ലിക്ക് ചെയ്യുക, ചാനലിന്റെ പേര് Colors എന്നു നല്‍കുക.), കോപ്പി ചെയ്ത ചിത്രം പേസ്റ്റ് ചെയ്യുക.
തിരികെ ലെയേഴ്സ് പാലെറ്റിലെത്തുക. Shades എന്ന പേരില്‍ മറ്റൊരു ലെയര്‍ കൂടി ചേര്‍ക്കുക. (Colors, Strokes എന്നീ ലെയറുകളുടെ മധ്യത്തിലായി വേണം Shades ചേര്‍ക്കുവാന്‍.) ചാനത്സ് പാലെറ്റിലെത്തി ആവശ്യമുള്ള ഭാഗം മാജിക് വാന്‍ഡ് ടൂള്‍ ഉപയോഗിച്ച് സെലക്ട് ചെയ്യുക. തിരികെ Shades ലെയ‌റിലെത്തി ബ്രഷ് ടൂള്‍ ഉപയോഗിച്ച് നിറങ്ങള്‍ക്ക് ആവശ്യമുള്ള രീതിയില് ഷേഡുകള്‍ നല്‍കാവുന്നതാണ്. ഭാവനയ്ക്ക് അനുസൃതമായി ഇഷ്ടമുള്ള നിറങ്ങള്‍ ഉപയോഗിക്കാവുന്നതാണ്. ആദ്യമുപയോഗിച്ച് സോളിഡ് കളറുകളെ ചാനലായി സൂക്ഷിച്ചിരിക്കുന്നതിനാല്‍, എപ്പോള്‍ വേണമെങ്കിലും ആവശ്യമുള്ള സെലക്ഷന്‍ ചിത്രത്തില്‍ കൊണ്ടുവരുവാന്‍ സാധിക്കും. സങ്കീര്‍ണമായ ചിത്രങ്ങള്‍ക്ക് നിറം നല്‍കുമ്പോള്‍ ഈ രീതി ഏറെ പ്രയോജനപ്രദമാണ്. അല്പം കലാഭിരുചി കൂടിയുണ്ടെങ്കില്‍ മികച്ച രീതിയില് ലൈന്‍‌ആര്‍ട്ടുകള്‍ക്ക് ഫോട്ടോഷോപ്പ് ഉപയോഗിച്ച് നിറം നല്‍കുവാന്‍ സാധിക്കും.
അനുബന്ധം
(2009 ജാനുവരി ലക്കം ഇന്‍ഫോകൈരളി കമ്പ്യൂട്ടര്‍ മാഗസീനില്‍ പ്രസിദ്ധീകരിച്ചത്.)
Description: Coloring images in Adobe Photoshop. Channels, Creating alpha channels, Loading selection from channels, Filling colors. Tutorial on Adobe Photoshop by Hareesh N. Nampoothiri aka Haree | ഹരീ for Sankethikam (Sangkethikam) Blog. Also published in InfoKairali January Issue.
--
ആദ്യമായി ബ്രഷ് ഉണ്ടാക്കുവാൻ ഉപയോഗപ്പെടുത്തുവാൻ കഴിയുന്ന ഒരു പൂവ് വരച്ചുണ്ടാക്കുകയാണ് വേണ്ടത്. 200 x 200 പിക്സൽ വലുപ്പമുള്ള ഒരു ഗ്രേ-സ്കെയിൽ ചിത്രം തുറക്കുക. ബ്രഷുകൾക്ക് പിന്നീട് നിറം നൽകുമ്പോൾ അവ ശരിയായി ദൃശ്യമാകുവാൻ, നിർമ്മാണവേളയിൽ ഗ്രേസ്കെയിലിലുള്ള ചിത്രങ്ങളാണ് വേണ്ടതെന്നുള്ളത് ഓർമ്മിക്കുക. ഈ ചിത്രത്തിൽ പൂവിന്റെ ഒരു ഇതൾ നിർമ്മിക്കുക. കറുപ്പ്, ഒരു ലൈറ്റ് ഗ്രേ ഷേഡ് എന്നിവ യഥാക്രമം ഫോർഗ്രൌണ്ട്, ബാക്ക്ഗ്രൌണ്ട് നിറങ്ങളായി തിരഞ്ഞെടുത്ത ശേഷം; അതുപയോഗിച്ചു വേണം ഈ ഇതൾ വരച്ചുണ്ടാക്കുവാന്‍. പെൻ‍ടൂൾ, പാത്ത് എന്നിവയും ഇത് വരയ്ക്കുവാൻ പ്രയോജനപ്പെടുത്താവുന്നതാണ്.
പൂവിന്റെ നടുവിലുള്ള ഭാഗം വൃത്താകൃതിയിൽ വരച്ചുചേർക്കുക. നേരത്തേ വരച്ചുണ്ടാക്കിയ ഇതൾ ഡ്യൂപ്ലിക്കേറ്റ് ചെയ്ത് ചുറ്റം അടുക്കുക. നടുവിലെ ഭാഗത്തിന് കൂടുതൽ സ്വാഭാവികത തോന്നിപ്പിക്കുവാൻ അനുയോജ്യമായ രീതി ഉപയോഗിക്കാവുന്നതാണ്. ഇതളുകളുടെ ചുവട്ടിൽ കാണാറുള്ള കലകളും മറ്റും വരച്ചു ചേർക്കുക, ഇതളുകളുടെ വലുപ്പത്തിലും, ആകൃതിയിലും ചില മാറ്റങ്ങൾ വരുത്തുക എന്നിവയും ചെയ്യാവുന്നതാണ്. ചിത്രത്തിൽ കാണുന്ന രീതിയിലൊരു പൂവിന്റെ രൂപമാണ് ഒടുവിൽ ലഭിക്കേണ്ടത്. വെളുപ്പ് ബാക്ക്ഗ്രൌണ്ട് ലെയർ ഒഴിവാക്കി, മറ്റുള്ള ലെയറുകളെല്ലാം ഒരുമിപ്പിച്ച് ചിത്രം സേവ് ചെയ്യുക. ചുറ്റും ധാരാളം സ്ഥലം ഒഴിവായി കിടപ്പുണ്ടെങ്കിൽ, Ctrl അമർത്തി ലഭ്യമായ ലെയ‍റിൽ മൌസമർത്തുക. ഇപ്പോൾ പൂവിന്റെ ചിത്രം പൂർണ്ണമായി സെലക്ട് ചെയ്തിട്ടുണ്ടാവും. പ്രധാനമെനുവിൽ Image > Crop അമർത്തുക. ഇപ്പോൾ പൂവ് ക്യാൻ‍വാസ് പൂർണ്ണമായും ഉപയോഗപ്പെടുത്തുന്ന രീതിയിലാവും കാണപ്പെടുക.
ഇപ്പോൾ നിർമ്മിച്ചെടുത്ത ഈ ബ്രഷ് ഒരു ആശംസാകാർഡിൽ എങ്ങിനെ ഉപയോഗപ്പെടുത്താം എന്നു നോക്കാം. 5in x 7in വലുപ്പത്തിൽ ഒരു പുതിയ ഡോക്യുമെന്റ് തുറക്കുക. കാർഡിൽ ഉപയോഗിക്കുവാൻ ആഗ്രഹിക്കുന്ന ചിത്രം അതിലേക്ക് ചേർക്കുക. ആവശ്യമുള്ള സന്ദേശവും ടൈപ്പ് ചെയ്തിനു ശേഷം; ചിത്രത്തിനു മുകളിലായി, എന്നാൽ ടൈപ്പ് ലെയ‍റിനു താഴെയായി മറ്റൊരു പുതിയ ലെയർ കൂട്ടിച്ചേർക്കുക. നമുക്കിതിനെ Strokes എന്നു വിളിക്കാം. ഇവിടെയാണ് നാം പുതുതായി ഉണ്ടാക്കിയ ബ്രഷ് പ്രയോഗിക്കുവാൻ പോവുന്നത്. ഇത്രയും ചെയ്തു കഴിയുമ്പോൾ നമുക്ക് ലഭിക്കുന്ന ചിത്രത്തില്‍ കാണുന്ന രീതിയിലൊരു ക്യാന്‍‌വാസ് ലഭ്യമാവും.
ആദ്യമായി ഒരു ചിത്രമോ പുതിയ ഒരു ഫോട്ടോഷോപ്പ് ഡോക്യുമെന്റോ തുറക്കുക. തുടര്‍ന്ന് അക്ഷരങ്ങള്‍ ക്രമീകരിക്കേണ്ട ആകൃതിയില്‍ ഒരു പാത്ത് വരച്ചുണ്ടാക്കുക. അതിനായി ടൂള്‍സ് ബാറില്‍ ലഭ്യമായിരിക്കുന്ന പെന്‍ ടൂള്‍ (P) സെലക്ട് ചെയ്യുക. പെന്‍ ടൂളിനു ലഭ്യമായ ഓപ്‌ഷന്‍സ് ബാറില്‍; Fill layers, Paths, Fill pixels എന്നിവയില്‍ Paths എന്നതായിരിക്കണം തിരഞ്ഞെടുത്തിരിക്കേണ്ടതെന്നതും ഓര്‍മ്മിക്കുക. ക്ലിക്ക് ചെയ്ത് ഡ്രാഗ് ചെയ്താല്‍ വളഞ്ഞ ആകൃതിയില്‍ പാത്ത് നിര്‍മ്മിക്കുക സാധ്യമാവും. വരയ്ക്കുമ്പോള്‍ Work Path എന്ന പേരില്‍ ഒരു പാത്ത് ലെയര്‍ പാത്ത്സ് പാലെറ്റിലേക്ക് ചേര്‍ത്തിരിക്കുന്നത് കാണുവാന്‍ സാധിക്കും. ആ പാത്ത് ലെയര്‍ സെലക്ട് ചെയ്തിരിക്കുന്ന അവസരത്തില്‍ മാത്രമായിരിക്കും പ്രസ്തുത പാത്ത് നമുക്ക് ചിത്രത്തില്‍ കാണുവാന്‍ സാധിക്കുക. പാത്ത്സ് പാലെറ്റില്‍, ഒഴിവായിരിക്കുന്ന ഭാഗത്ത് ക്ലിക്ക് ചെയ്താല്‍, എല്ലാ പാത്ത് ലെയറുകളും സെലക്ഷനില്‍ നിന്നും ഒഴിവാകുകയും, ചിത്രത്തില്‍ പാത്തുകളൊന്നും കാണാതിരിക്കുകയും ചെയ്യും.
അടുത്തതായി ടെക്സ്റ്റ് ടൂള്‍ തിരഞ്ഞെടുക്കുക. ടൂള്‍ പാത്തിനു സമീപം കൊണ്ടുവരുമ്പോള്‍ ചിത്രത്തില്‍ കാണുന്ന രീതിയില് പ്രത്യേകതയുള്ള ഒരു ടൂള്‍ ഐക്കണ് ലഭ്യമാവും. ഇപ്പോള്‍ ക്ലിക്ക് ചെയ്ത് ടൈപ്പ് ചെയ്തു തുടങ്ങുക. അക്ഷരങ്ങള്‍ വരച്ച പാത്തിന് അനുസൃതമായാവും ചേര്‍ക്കപ്പെടുക.
അതിനായി പുതിയൊരു ഡോക്യുമെന്റ് തുറന്ന്; സ്റ്റേജില്‍, ഒരു വൃത്തം ആദ്യമായി എലിപ്റ്റിക്കല്‍ മാര്‍ക്യൂ ടൂള്‍ (M) ഉപയോഗിച്ച് വരച്ചുണ്ടാക്കുക. Shift കീ അമര്‍ത്തിയിരുന്നാല്‍ ഒരു സമവൃത്തം നമുക്ക് ലഭിക്കുന്നതാണ്. അതിനു ശേഷം പാത്ത്സ് പാലെറ്റില്‍ ചിത്രത്തില്‍ കാണുന്ന ബട്ടണില്‍ മൌസമര്‍ത്തി (Make work path from selection) ഇപ്പോള്‍ സ്റ്റേജില്‍ ലഭ്യമായ സെലക്ഷനെ ഒരു പാത്താക്കി മാറ്റാവുന്നതാണ്. തുടര്‍ന്ന് മുന്‍പു ചെയ്തതുപോലെ ടെക്സ്റ്റ് ടൂള്‍ സെലക്ട് ചെയ്ത്, പാത്തിനു സമീപം ടെക്സ്റ്റ് ടൂള്‍ കൊണ്ടുവന്ന്, ഐക്കണ് വ്യത്യാസപ്പെടുമ്പോള്‍ ക്ലിക്ക് ചെയ്ത്, ടൈപ്പ് ചെയ്തു തുടങ്ങുക. ചിത്രം വൃത്താകൃതിയില്‍ ചേര്‍ക്കപ്പെടും.
ടെക്സ്റ്റ് ലെയറിന്റെ അതേ പേരില്‍ ഒരു Type Path ആയി പാത്ത്സ് പാലെറ്റില്‍ പ്രസ്തുത പാത്ത് സേവ് ചെയ്യപ്പെടും. ഈ പാത്ത് നേരിട്ട് ഡിലീറ്റ് ചെയ്യുവാന്‍ സാധിക്കുകയില്ല. അനുബന്ധ ടെക്സ്റ്റ് ലെയര്‍ ഒഴിവാക്കപ്പെടുമ്പോള്‍, അതിനോടൊപ്പം ഈ പാത്തും ഡിലീറ്റ് ചെയ്യപ്പെടും.
തുടര്‍ന്ന് ബ്രഷ് ടൂള്‍ (B) സെലക്ട് ചെയ്തതിനു ശേഷം സ്റ്റേജില്‍ വലതുമൌസ് ബട്ടണ്‍ അമര്‍ത്തി ഒരു ബ്രഷ് സെലക്ട് ചെയ്യുക. ആകര്‍ഷകമായ ഒരു ഫോര്ഗ്രൌണ്ട് നിറവും തിരഞ്ഞെടുക്കുക. ചിത്രത്തില്‍ കാണുന്ന രീതിയില് Stroke path with brush എന്ന ഓപ്‌ഷനില്‍ മൌസമര്‍ത്തുക. സെലക്ട് ചെയ്ത ബ്രഷ് സ്റ്റൈല്‍/നിറം എന്നിവയ്ക്ക് അനുസൃതമായി പാത്തിന്റെ ഭാഗത്ത് ഒരു ബ്രഷ് സ്ട്രോക്ക് ചേര്‍ക്കപ്പെടും.
ഡിഫോള്‍ട്ടായി ലഭിക്കുന്ന Actions പാനലാണ് വശത്തുള്ള ചിത്രത്തില്‍ കാണുന്നത്. Default Actions എന്ന ഒരൊറ്റ ആക്ഷന്‍ സെറ്റ് മാത്രമാവും പാനലില്‍ ഇപ്പോള്‍ ലഭ്യമായിരിക്കുക. ഫോള്‍ഡര്‍ ഐക്കണ് സമീപമായി കാണുന്ന നീല നിറത്തിലുള്ള ആരോയില്‍ ക്ലിക്ക് ചെയ്ത് സെറ്റിനുള്ളിലെ ആക്ഷനുകള്‍ ദൃശ്യമാക്കുവാന്‍ സാധിക്കും. ഫോട്ടോഷോപ്പില്‍ ഡിഫോള്‍ട്ടായി ലഭ്യമായ ഒരു ആക്ഷനായ Gradient Map എന്ന ആക്ഷന്‍ എക്സ്‌പാന്‍ഡ് ചെയ്തത് താഴെയുള്ള ചിത്രത്തില്‍ നല്‍കിയിരിക്കുന്നത് ശ്രദ്ധിക്കുക.
പുതുതായി ഒരു ലെയര്‍ ലെയേഴ്സ് പാലെറ്റില്‍ കൂട്ടിച്ചേര്‍ത്ത്, അതിന് snow_brush എന്നു പേരു നല്‍കുക. കസ്റ്റം ഷേപ്പ് ടൂള്‍ സെലക്ട് ചെയ്ത്, ഒപ്ഷന്‍സ് ബാറില്‍ ലഭ്യമായ ഷേപ്പ് പ്രീസെറ്റുകളില്‍ നിന്നും ചിത്രത്തില്‍ കാണുന്ന രീതിയില് Snowflake 3 എന്ന ഷേപ്പ് സെലക്ട് ചെയ്യുക.
കസ്റ്റം ഷേപ്പ് ഓപ്ഷന്‍സില്‍ നിന്നും Defined Size എന്ന ഓപ്ഷന് സെലക്ട് ചെയ്യുക. ഫോര്ഗ്രൌണ്ട് നിറമായി കറുപ്പ് സെലക്ട് ചെയ്യുക. ബ്രഷുകള്‍ നിര്‍മ്മിക്കുമ്പോള്‍ കറുപ്പു നിറം ഉപയോഗിക്കുവാന്‍ പ്രത്യേകം ശ്രദ്ധിക്കുക. മറ്റു നിറങ്ങള്‍ ബ്രഷിന്റെ ഒപ്പാസിറ്റി വിലയെ ബാധിക്കുമെന്നതിനാലാണത്. തുടര്‍ന്ന് ക്യാന്‍‌വാസിലെവിടെങ്കിലും ക്ലിക്ക് ചെയ്യുക, ഷേപ്പ് അതിന്റെ യഥാര്‍ത്ഥ വലുപ്പത്തില്‍ ക്യാന്‍‌വാസില്‍ ചേര്‍ക്കപ്പെടും. ലെയേഴ്സ് പാലെറ്റില്‍ snow_brush എന്ന ലെയര്‍ ആക്ടീ‍വായിരിക്കുമ്പോളാണ് ഇത് ചെയ്യേണ്ടതെന്നത് പ്രത്യേകമോര്‍ക്കുക. ഷേപ്പ് ചേര്‍ത്ത ലെയറില് വലതു മൌസ് ബട്ടണ്‍ അമര്‍ത്തി Rasterize Layer എന്ന ഓപ്ഷന് സെലക്ട് ചെയ്യുക. ഇപ്പോള്‍ ആ ലെയര്‍ ഒരു സാധാരണ പിക്സല്‍ ലെയ‌റായി മാറിയിട്ടുണ്ടാവും.
