Chithravishesham
Sankethikam
Kaliyarangu Grahanam Nishchalam
സാങ്കേതികം - ഗ്രാഫിക് ഡിസൈന്‍ ട്യൂട്ടോറിയലുകള്‍, ബ്ലോഗര്‍ വിഡ്ജറ്റുകള്‍...

Content on this page requires a newer version of Adobe Flash Player.

Get Adobe Flash player

Malayalam Blogger Profile. Powered by newnmedia.

Tuesday, July 24, 2007

ഫയര്‍ഫോക്സും ആഡ്‌-ഓണുകളും

Firefox, Add-ons, Mozilla, Download, Selected, Recommended, FireFTP, FlashGot, Greasemonkey, Download Manager, Padma, FireFTP, InfoKairali, Info Kairali, Article, Published
ഫയര്‍ഫോക്സെന്നു കേള്‍ക്കാത്തവര്‍ വിരളമായിരിക്കും. ഇന്റര്‍നെറ്റില്‍ ലഭ്യമായ വെബ് പേജുകള്‍ കാണുവാന്‍ നമ്മുടെ കമ്പ്യൂട്ടറില്‍ അത്യാവശ്യം വേണ്ട ഒരു സോഫ്റ്റ്വെയറാണല്ലോ ബ്രൌസര്‍. വിന്‍ഡോസിനൊപ്പം ഇന്‍സ്റ്റാള്‍ ചെയ്യപ്പെടുന്ന ഇന്റര്‍നെറ്റ് എക്സ്പ്ലോററാണ് അധികം പേരും ഉപയോഗിക്കുക. എന്നാല്‍ ഇതല്ലാതെ ധാരാളം മറ്റ് ബ്രൌസറുകളും ഇന്ന് ലഭ്യമാണ്. അത്തരത്തിലൊരു ബ്രൌസറാണ് മോസില്ല ഫയര്‍ഫോക്സ്. ഒരു ഓപ്പണ്‍ സോഴ്സ് പ്രോഗ്രാമായ ഫയര്‍ഫോക്സിന് ഇന്റര്‍നെറ്റ് എക്സ്പ്ലോററിനില്ലാത്ത നിരവധി മേന്മകളുണ്ട്. അവയില്‍ പ്രധാനപ്പെട്ട ഒന്നാണ് ആഡ്-ഓണുകള്‍ ചേര്‍ക്കുവാനുള്ള സൌകര്യം.

എന്താണ് ഫയര്‍ഫോക്സ് ആഡ്-ഓണുകള്‍?
ഇന്റര്‍നെറ്റില്‍ ലഭ്യമായ വെബ് പേജുകള്‍ നമ്മുടെ കമ്പ്യൂട്ടറില്‍ ലഭ്യമാക്കുക എന്നതിലുപരിയായി ഫയര്‍ഫോക്സിനെ ഇന്റര്‍നെറ്റുമായി ബന്ധപ്പെട്ട വിവിധ കാര്യങ്ങള്‍ക്ക് പ്രയോജനപ്പെടുത്തുവാനും ഫയര്‍ഫോക്സിനെ നമ്മുടെ ആവശ്യങ്ങള്‍ക്കുതകുന്ന തരത്തില്‍ സജ്ജമാക്കുവാനും സഹായിക്കുന്ന ചെറു സോഫ്റ്റ്‌വെയറുകളെയാണ് ആഡ്-ഓണുകള്‍ എന്നു പറയുന്നത്. പല ആവശ്യങ്ങള്‍ക്കായി പല തരത്തിലുള്ള ആഡ്-ഓണുകള്‍ ഇന്ന് ലഭ്യമാണ്. അതൊരു പക്ഷെ പ്ലഗിനുകളാവാം (ഉദാ: ഫ്ലാഷ് മൂവികള്‍ അടങ്ങിയിരിക്കുന്ന ഒരു വെബ് പേജ് ദൃശ്യമാക്കുവാന്‍ ഫ്ലാഷ് പ്ലഗിന്‍ ഇന്‍സ്റ്റാള്‍ ചെയ്തിരിക്കണം), സേര്‍ച്ച് എഞ്ചിനുകളാവാം (ഫയര്‍ഫോക്സില്‍ അഡ്രസ് ബാറിനു സമീപമായി ഒരു സേര്‍ച്ച് ബോക്സ് ലഭ്യമാണ്. അതായത് ഗൂഗിളിന്റെ ഒരു സേര്‍ച്ച് എഞ്ചിന്‍ ആഡ്-ഓണ്‍ ഇന്‍സ്റ്റാള്‍ ചെയ്തിരുന്നാല്‍, ഗൂഗിളിന്റെ വെബ് സൈറ്റിലെത്താതെ തന്നെ സേര്‍ച്ച് ചെയ്തു തുടങ്ങാവുന്നതാണ്, റിസള്‍ട്ടുകള്‍ ബ്രൌസറില്‍ തുറന്നുവരും), തീമുകളാവാം (ഫയര്‍ഫോക്സിന്റെ രൂപത്തിലും ഭാവത്തിലും മാറ്റം വരുത്തുവാന്‍ തീമുകള്‍ ഉപയോഗിക്കാം), എക്സ്റ്റന്‍ഷനുകളാവാം (ബ്രൌസര്‍ എന്നതിലുപരിയായി ഫയര്‍ഫോക്സിനെ മറ്റ് ആവശ്യങ്ങള്‍ക്കും ഉതകുന്ന രീതിയില്‍ വിപുലപ്പെടുത്തുവാനുള്ള ആഡ്-ഓണുകള്‍). തിരഞ്ഞെടുത്ത അഞ്ച് ആഡ്-ഓണുകളെ ഇവിടെ പരിചയപ്പെടുത്തുന്നു.

തിരഞ്ഞെടുത്ത ആഡ്-ഓണുകള്‍
1. ഫ്ലാഷ്‌ഗോട്ട് (FlashGot)
ഫയര്‍ഫോക്സില്‍ ഡൌണ്‍ലോഡുകള്‍ മാനേജ് ചെയ്യുവാനായി ഒരു ഡിഫോള്‍ട്ട് ഡൌണ്‍ലോഡ് മാനേജര്‍ ലഭ്യമാണ്. എന്നാല്‍ ഒരു തേഡ്-പാര്‍ട്ടി ഡൌണ്‍ലോഡ് മാനേജര്‍ നമ്മുടെ സിസ്റ്റത്തില്‍ ഇന്‍സ്റ്റാള്‍ ചെയ്തിട്ടുണ്ടെങ്കില്‍, അതിലേക്ക് ഡൌണ്‍ലോഡുകളെ തിരിച്ചുവിടുവാനായി ഫ്ലാഷ്‌ഗോട്ട് എന്ന ആഡ്-ഓണ്‍ പ്രയോജനപ്പെടുത്താം. അതുമാത്രവുമല്ല ഒരു പേജിലെ അല്ലെങ്കില്‍ വിവിധ ടാബുകളിലെ ഡൌണ്‍ലോഡ് ചെയ്യുവാന്‍ സാധിക്കുന്ന എല്ലാ ഫയലുകളേയും ഒറ്റയടിക്ക് ഡൌണ്‍ലോഡ് ചെയ്യുവാനുള്ള നിരയിലേക്ക് കൂട്ടിച്ചേര്‍ക്കുവാനും ഫ്ലാഷ്‌ഗോട്ട് ഉപയോഗിച്ച് സാധിക്കും. ഒന്നില്‍ കൂടുതല്‍ ഡൌണ്‍ലോഡ് മാനേജറുകള്‍ ഒരേ സമയം ഇന്‍സ്റ്റാള്‍ ചെയ്തിരിക്കുന്ന കമ്പ്യൂട്ടറുകളില്‍, ഓരോ ഫയല്‍ ഡൌണ്‍ലോഡ് ചെയ്യുമ്പോഴും ഏതു മാനേജര്‍ ഉപയോഗിക്കണമെന്ന് പ്രത്യേകം തിരഞ്ഞെടുക്കുവാനും ഫ്ലാഷ്‌ഗോട്ട് ഉപയോഗിച്ചു സാധിക്കുന്നു. ഫ്ലാഷ്‌ഗോട്ടിനൊപ്പം ഉപയോഗിക്കാവുന്ന ഒരു സൌജന്യ ഡൌണ്‍ലോഡ് മാനേജറാണ് Free Download Manager (FDM).
ഇന്‍സ്റ്റാള്‍ ചെയ്യുക


2. ഐ.ഇ. ടാബ് (IE Tab)
ഇന്റര്‍നെറ്റില്‍ ഫയര്‍‌ഫോക്സ് ഉപയോഗിച്ച് ബ്രൌസ് ചെയ്യുമ്പോള്‍ ഐ.ഇ-യില്‍ മാത്രം ശരിയായി പ്രവര്‍ത്തിക്കുന്ന പല വെബ് സൈറ്റുകളിലും എത്തിപ്പെടും. അങ്ങിനെയുള്ള അവസരങ്ങളില്‍, ഐ.ഇ തുറന്ന് വെബ്-അഡ്രസ് കോപ്പി-പേസ്റ്റ് ചെയ്ത്, അതേ വെബ്-പേജ് വീണ്ടും ലോഡ് ചെയ്യിക്കുക എന്ന ബുദ്ധിമുട്ട് ഒഴിവാക്കുവാന്‍ ഈ ആഡ്-ഓണ്‍ ഉപയോ‍ഗിക്കാം. കൂടാതെ മലയാളം ബ്ലോഗുകളിലെ ചില്ലക്ഷരങ്ങള്‍ ശരിയായി ദൃശ്യമാക്കുവാനും, അലൈന്മെന്റ് ജസ്റ്റിഫൈ എന്ന് സെലക്ട് ചെയ്തിരിക്കുന്ന മലയാളത്തിലുള്ള പാരഗ്രാഫുകള്‍ ശരിയായി വായിക്കുവാനും ഐ.ഇ. ടാബ് പ്രയോജനപ്പെടുത്താം. ഫയര്‍ഫോക്സിനുള്ളില്‍ നിന്നു തന്നെ ഐ.ഇ. റെന്‍ഡറിംഗ് എഞ്ചിന്‍ ഉപയോഗിച്ച് വെബ് പേജുകള്‍ ദൃശ്യമാക്കുകയാണ് ഐ.ഇ. ടാബ് ചെയ്യുന്നത്. ഈ രീതിയില്‍ ബ്രൌസ് ചെയ്യുമ്പോ‍ള്‍ ഫയര്‍ഫോക്സിന്റെ ബ്രൌസര്‍ ഇന്റര്‍ഫേസ് മാത്രമേ ഉപയോഗിക്കപ്പെടുന്നുള്ളൂ എന്നതും ഓര്‍മ്മയിരിക്കട്ടെ. അതായത്, ഇന്റര്‍നെറ്റ് എക്സ്പ്ലോ‍റര്‍ റെന്‍ഡറിംഗ് എഞ്ചിനുള്ള പോരാ‍യ്മകള്‍ ഇവിടെയും പ്രതിഫലിക്കും.

ഈ ആഡ്-ഓണ്‍ ഇന്‍സ്റ്റാള്‍ ചെയ്തു കഴിയുമ്പോള്‍ സ്റ്റാറ്റസ് ബാറില്‍ വലതു മൂലയ്ക്കായി ഫയര്‍ഫോക്സിന്റെ ഒരു ഐക്കണ്‍ ദൃശ്യമായിരിക്കും. ഇതില്‍ ഇടതുമൌസമര്‍ത്തിയാല്‍ ഇപ്പോള്‍ കാ‍ണുന്ന പേജ് അതേ ടാബില്‍ ഐ.ഇ. എഞ്ചിന്‍ ഉപയോഗിച്ച് റെന്‍ഡര്‍ ചെയ്യും, നടുവിലെ ബട്ടണാണ് അമര്‍ത്തുന്നതെങ്കില്‍ അതേ പേജ് പുതിയൊരു ടാബിലാവും റെന്‍ഡര്‍ ചെയ്യപ്പെടുക. വലതു മൌസ് ബട്ടണ്‍ അമര്‍ത്തിയാല്‍ കൂടുതല്‍ ഓപ്ഷനുകള്‍ ലഭ്യമായ IE Tab Options ഡയലോഗ് ബോക്സ് ദൃശ്യമാവും. Tools > IE Tab Options സെലക്ട് ചെയ്തും ഈ ഡയലോഗ് ബോക്സ് ലഭ്യമാക്കാം. ഡിഫോള്‍ട്ടായി ചില വെബ് സൈറ്റുകള്‍ ഐ.ഇ. എഞ്ചിനില്‍ തുറക്കുക, ഐ.ഇ. എഞ്ചിനല്ലാതെ മറ്റ് ബ്രൌസറുകളുടെ എഞ്ചിന്‍ ഉപയോഗിക്കുവാനായി സെറ്റ് ചെയ്യുക എന്നിങ്ങനെയുള്ള ചില സാധ്യതകള്‍ കൂടുതലായി ഇവിടെ ലഭ്യമാണ്.
ഇന്‍സ്റ്റാള്‍ ചെയ്യുക


3. പദ്മ (Padma)
നമുക്കറിയാം, മലയാള ദിനപത്രങ്ങളില്‍ പലതും അവരവരുടെ സ്വന്തം ഫൊണ്ടുകളാണ് അവരവരുടെ വെബ്-സൈറ്റുകളില്‍ ഉപയോഗിക്കുന്നത്. യൂണിക്കോഡിലേക്ക് ആരും എത്തിത്തുടങ്ങിയിട്ടില്ല. അതിനാല്‍ തന്നെ ഓരോ വെബ് സൈറ്റിം ശരിയായി കാണുവാന്‍, അതാത് ഫോണ്ടുകള്‍ സിസ്റ്റത്തില്‍ ഇന്‍സ്റ്റാള്‍ ചെയ്യേണ്ടതുണ്ട്. ഇതിനൊരു പരിഹാരമാ‍ണ് പദ്മ എന്ന ആഡ്-ഓണ്‍. ഇത് വിവിധ മലയാളം വെബ് സൈറ്റുകളെ ലഭ്യമായ യൂണിക്കോഡ് മലയാളം ഫോണ്ടില്‍ ദൃശ്യമാക്കുവാന്‍ സഹായിക്കുന്നു. അതായത് ഒരോ വെബ് സൈറ്റും കാണുവാനായി അതാത് ഫോണ്ടുകള്‍ ഇന്‍സ്റ്റാള്‍ ചെയ്യേണ്ടതില്ല. മലയാളം മാത്രമല്ല; തെലുങ്ക്, തമിഴ്, ദേവനാഗിരി, ഗുജറാത്തി, ബംഗാളി, കന്നട, ഗുര്‍മുഖി തുടങ്ങിയ ഭാഷകളിലുള്ള വെബ് സൈറ്റുകളേയും യൂണിക്കോഡിലേക്ക് മൊഴിമാറ്റി ദൃശ്യമാക്കുവാന്‍ പദ്മ ഉപകരിക്കും.

പദ്മ ഉപയോഗിക്കുമ്പോള്‍, ഒരുപക്ഷെ ചില സൈറ്റുകള്‍ ഡിഫോള്‍ട്ടായി കണ്‍‌വര്‍ട്ട് ചെയ്യപ്പെടില്ല. അങ്ങിനെയുള്ളവ സ്വന്തമായി പ്രത്യേകം എന്റര്‍ ചെയ്തു നല്‍കുക. Tools > Add-ons എന്ന ലിസ്റ്റില്‍ പദ്മ സെലക്ട് ചെയ്യുക. Options എന്ന ബട്ടണില്‍ ക്ലിക്ക് ചെയ്ത് Padma Preference എന്ന ഡയലോഗ് ലഭ്യമാക്കുക. അവിടെ Enable Auto Trasform എന്നത് ‘ടിക്’ ചെയ്ത് Update ബട്ടണില്‍ മൌസമര്‍ത്തുക. തുറന്നുവരുന്ന വിന്‍ഡോയില്‍ പുതിയ സൈറ്റുകള്‍ കൂട്ടിച്ചേര്‍ക്കാവുന്നതാണ്.
ഇന്‍സ്റ്റാള്‍ ചെയ്യുക


4. ഫയര്‍ എഫ്.ടി.പി (FireFTP)
ഇത് പ്രധാനമായും സ്വന്തമായി ഒരു വെബ് സൈറ്റ്, ഒരു FTP (File Transfer Protocol) ആക്സസ് ഉള്ള സെര്‍വറില്‍ സൂക്ഷിക്കപ്പെടുന്ന വെബ് സൈറ്റ്, ഉള്ളവര്‍ക്ക് പ്രയോജനപ്പെടുന്ന ഒരു ആഡ്-ഓണ്‍ ആണ്. ആഡ് ഓണ്‍ ഇന്‍സ്റ്റാള്‍ ചെയ്തു കഴിഞ്ഞാല്‍ പ്രധാന മെനുവില്‍ Tools > FireFTP എന്ന ഐറ്റം സെലക്ട് ചെയ്ത് ഈ ഓപ്ഷന്‍ റണ്‍ ചെയ്യാവുന്നതാണ്. താഴെക്കാണുന്ന രീതിയിലൊരു ജാലകമാവും നമുക്ക് തുടര്‍ന്നു ലഭിക്കുക.

സൂചന: ചിത്രത്തില്‍ മൌസമര്‍ത്തിയാല്‍ പൂര്‍ണ്ണരൂപം പുതിയ ജാലകത്തില്‍ കാണുവാന്‍ സാധിക്കും.

ഇടതു വശത്ത് മുകളിലായിക്കാണുന്ന Manage Account എന്ന ടാബില്‍ മൌസമര്‍ത്ത്, ലഭ്യമായ മെനുവില്‍ നിന്നും New... എന്ന ഓപ്ഷന്‍ സെലക്ട് ചെയ്യുക. തുറന്നുവരുന്ന Account Manager ഡയലോഗ് ബോക്സില്‍ ആവശ്യമുള്ള വിവരങ്ങള്‍ നല്‍കി Connect എന്ന ബട്ടണില്‍ ക്ലിക്ക് ചെയ്യുക. ഇടതു ഭാഗത്ത് നമ്മുടെ കമ്പ്യൂട്ടറിലെ ഫയലുകളും വലതുഭാഗത്ത് റിമോട്ട് സെര്‍വറിലെ ഫയലുകളും ലിസ്റ്റ് ചെയ്യപ്പെടും. ആവശ്യമുള്ള ഫയലുകള്‍ സെലക്ട് ചെയ്ത് നടുവിലെ ആരോ ബട്ടണുകളില്‍ ക്ലിക്ക് ചെയ്ത് ഡൌണ്‍ലോഡിംഗ്/അപ്‌ലോഡിംഗ് എന്നിവ സാധ്യമാക്കാം. ഫയലുകള്‍ സെലക്ട് ചെയ്ത് ഡ്രാഗ് ചെയ്തും അങ്ങോട്ടുമിങ്ങോട്ടും മൂവ് ചെയ്യാവുന്നതാണ്. ഒരു എഫ്.ടി.പി. ക്ലയന്റിനു വേണ്ട പ്രാഥമികമായ എല്ലാ സാധ്യതകളും FireFTP-യില്‍ ലഭ്യമാണ്.
ഇന്‍സ്റ്റാള്‍ ചെയ്യുക


5. ഗ്രീസ്‌മങ്കി (Greasemonkey)
ചെറിയ ജാവ സ്ക്രിപ്റ്റുകളുപയോഗിച്ച് നമ്മള്‍ സന്ദര്‍ശിക്കുന്ന വെബ് സൈറ്റുകളുടെ രൂപത്തേയും അതിന്റെ പ്രവര്‍ത്തനത്തേയും നമ്മുടെ ആവശ്യങ്ങള്‍ക്കുതകുന്ന രീതിയിലാക്കുവാന്‍ ഈ ആഡ്-ഓണ്‍ സഹായിക്കുന്നു. ഗ്രീസ്‌മങ്കിയില്‍ ഉപയോഗിക്കുവാന്‍ കഴിയുന്ന കുറേയധികം സ്ക്രിപ്റ്റുകള്‍ ഇവിടെ ലഭ്യമാണ്. ഇതു കൂടാതെ നമുക്ക് സ്വന്തമായി സ്ക്രിപ്റ്റുകള്‍ എഴുതുവാനും സാധിക്കും.

ഗ്രീസ്‌മങ്കി ഇന്‍സ്റ്റാള്‍ ചെയ്തു കഴിയുമ്പോള്‍ ഒരു കുരങ്ങന്റെ തല സ്റ്റാ‍റ്റസ് ബാറില്‍ വലത്തേയറ്റത്തായി ലഭ്യമാവും. അതില്‍ ക്ലിക്ക് ചെയ്തി ഗ്രീസ്‌മങ്കി സ്ക്രിപ്റ്റുകള്‍ എനേബിള്‍/ഡിസേബിള്‍ ചെയ്യുവാന്‍ കഴിയും. Tools > Greasemonkey > Manage User Scripts... സെലക്ട് ചെയ്താല്‍ ഓരോ സ്ക്രിപ്റ്റും ഉപയോഗിക്കേണ്ട പേജുകള്‍, ഉപയോഗിക്കരുതാത്ത പേജുകള്‍ എന്നിവയൊക്കെ സെറ്റ് ചെയ്യുവാന്‍ സാധിക്കും. ആവശ്യം കഴിഞ്ഞ സ്ക്രിപ്റ്റുകള്‍ ഇവിടെ നിന്നും ഒഴിവാക്കുകയുമാവാം.
ഇന്‍സ്റ്റാള്‍ ചെയ്യുക
--
(2007 സെപ്റ്റംബര്‍ ലക്കം ഇന്‍ഫോകൈരളി കമ്പ്യൂട്ടര്‍ മാഗസീനില്‍ പ്രസിദ്ധീകരിച്ചത്.)
Keywords: Firefox, Add-ons, Mozilla, Download, Selected, Recommended, FireFTP, FlashGot, Greasemonkey, Download Manager, Padma, FireFTP, InfoKairali, Info Kairali, Article, Published
--


Friday, July 13, 2007

പുതുമകളോടെ അഡോബി ഫ്ലാഷ്

Adobe Flash CS3, Introduction, What's New, InfoKairali, Article, General, Malayalam
മാക്രോമീഡിയയെ അഡോബി ഏറ്റെടുത്തതിനു ശേഷം പുറത്തിറക്കുന്ന ഫ്ലാഷിന്റെ പുതിയ വേര്‍ഷനാണ് അഡോബി ഫ്ലാഷ് സി.എസ്.-3. അഡോബി ക്രിയേറ്റീവ് സ്യൂട്ട് 3-യുടെ ഭാഗമായ ഫ്ലാഷ് സി.എസ്.-3യുടെ വേര്‍ഷന്‍ ഒന്‍പതാണ്. ധാരാളം പുതുമകളോടെയാണ് പുതിയ ഫ്ലാഷ് വിപണിയിലെത്തിയിരിക്കുന്നത്. ഫ്ലാഷ് സി.എസ്.-3-യിലെ പ്രധാനപ്പെട്ട നൂതന സാധ്യതകളെ ഇവിടെ പരിചയപ്പെടുത്തുന്നു.

ഒന്ന്: ഇന്റര്‍ഫേസ്
അഡോബി ഫ്ലാഷ് സി.എസ്.-3 തുറന്നു വരുമ്പോള്‍ തന്നെ ശ്രദ്ധിക്കപ്പെടുന്നതാണ് അതിന്റെ പുതുക്കിയ ഇന്റര്‍ഫേസ്. ക്രിയേറ്റീവ് സ്യൂട്ട് 3-ലെ മറ്റ് ആപ്ലിക്കേഷനുകളുടെ (ഫോട്ടോഷോപ്പ്, ഇന്‍ഡിസൈന്‍ മുതലായവ) ഇന്റര്‍ഫേസിന് സമാനമാണ് ഫ്ലാഷിലെ ഇന്റര്‍ഫേസ്.

സൂചന: ചിത്രത്തില്‍ മൌസമര്‍ത്തിയാല്‍ പൂര്‍ണ്ണരൂപം പുതിയ ജാലകത്തില്‍ ദൃശ്യമാവും.

ഇന്റര്‍ഫേസിലെ ഏറ്റവും വലിയ പ്രത്യേകത അതില്‍ പാലെറ്റുകള്‍ അടുക്കിയിരിക്കുന്ന രീതിയാണ്. സ്ഥലം വളരെ കുറച്ചെടുക്കുന്ന രീതിയില്‍ പാലെറ്റുകളെ സ്ക്രീനില്‍ അടുക്കുവാന്‍ സാധിക്കും. ഐക്കണ്‍ മാത്രമായി, ഐക്കണ്‍ ലേബലോടു കൂടി, പഴയ രീതിയില്‍ പാലെറ്റ് മുഴുവനായി, എന്നിങ്ങനെ മൂ‍ന്ന് സാധ്യതകളാണ് ലഭ്യമായിരിക്കുന്നത്. മറ്റൊരു പ്രധാന വ്യത്യാസം ടൂ‍ള്‍ ബാറിലാണ്. ഒറ്റ നിരയിലും, രണ്ടു നിരയായും ടൂള്‍ ബാര്‍ ദൃശ്യമാക്കുവാന്‍ സാധിക്കും. ഒറ്റ നിരയാണെങ്കില്‍ പിന്നെയും സ്ഥലം ലാഭിക്കാം.

ഒരു പാലെറ്റ് ഏരിയായില്‍ തന്നെ പല ടാബുകളായി പല പാലെറ്റുകള്‍ കൂട്ടിച്ചേര്‍ക്കാം എന്നതാണ് മറ്റൊരു സാധ്യത. ആക്ഷന്‍സ് പാനല്‍ പോലും ഈ രീതിയില്‍ ഡോക്ക് ചെയ്യുവാന്‍ സാധിക്കും. ഇതും കുറഞ്ഞ സ്ഥലത്ത് ആവശ്യമുള്ള എല്ലാ പാലെറ്റുകളും എളുപ്പത്തില്‍ തുറക്കാവുന്ന രീതിയില്‍ അടുക്കുവാന്‍ സഹായിക്കുന്നു.


രണ്ട്: ആക്ഷന്‍സ്ക്രിപ്റ്റ് 3
ആക്ഷന്‍സ്ക്രിപ്റ്റിംഗ് ഫ്ലാഷ് സി.എസ്. 3-യില്‍ അടുത്ത വേര്‍ഷനിലേക്ക് കടന്നിരിക്കുന്നു. ആക്ഷന്‍സ്ക്രിപ്റ്റ് രണ്ടിനെ അപേക്ഷിച്ച് കുറച്ചുകൂടി കഠിനമായ ശൈലിയാണ് പുതിയ വേര്‍ഷനിലേത്. ബട്ടണ്‍ ആക്ഷന്‍, മൂവി ക്ലിപ്പ് ആക്ഷന്‍ എന്നിവ ഇതില്‍ ലഭ്യമല്ല. ഫ്രയിം ആക്ഷനായിത്തന്നെ ബട്ടണ്‍/മൂവി ക്ലിപ്പ് ആക്ഷനുകളും നല്‍കേണ്ടതുണ്ട്. എന്നാല്‍ പ്രയോജനകരമായ പുതിയ ഇന്‍ബില്‍റ്റ് ഫംഗ്ഷനുകള്‍ ഇതില്‍ കൂട്ടിച്ചേര്‍ക്കപ്പെട്ടിട്ടുണ്ട്.

സൂചന: ചിത്രത്തില്‍ മൌസമര്‍ത്തിയാല്‍ പൂര്‍ണ്ണരൂപം പുതിയ ജാലകത്തില്‍ ദൃശ്യമാവും.

ആക്ഷന്‍സ്ക്രിപ്റ്റ് 2 ഉപയോഗിച്ച് ശീലിച്ചവര്‍ ഭയക്കേണ്ടതില്ല. ആക്ഷന്‍സ്ക്രിപ്റ്റ് 2 ഉപയോഗിച്ച് സ്ക്രിപ്റ്റിംഗ് നടത്തുവാനുള്ള സൌകര്യവും ഇതില്‍ ലഭ്യമാണ്. എന്നാല്‍ പുതിയ ഫംഗ്ഷനുകളുടെ പ്രയോജനങ്ങള്‍ അപ്പോള്‍ ലഭ്യമാവില്ലെന്നുമാത്രം. ഇനി വരുന്ന വേര്‍ഷനുകള്‍ ആക്ഷന്‍സ്ക്രിപ്റ്റ് 2-നെ പിന്തുണയ്ക്കുമോ എന്ന് പറയുവാന്‍ കഴിയാത്തതിനാല്‍, ആക്ഷന്‍സ്ക്രിപ്റ്റ് 3 ഉപയോഗിച്ചു തുടങ്ങുന്നതാവും അഭികാമ്യം.


മൂന്ന്: ഫോട്ടോഷോപ്പ്/ഇല്ലുസ്ട്രേറ്റര്‍ ഇന്റഗ്രേഷന്‍
എടുത്തു പറയേണ്ട ഒരു പുതുമയാണിത്. ഫോട്ടോഷോപ്പ് ഫയലുകളും(*.psd), ഇല്ലുസ്ട്രേറ്റര്‍ ഫയലുകളും(*.ai) അതേപടി ഫ്ലാഷിലേക്ക് ഇം‌പോര്‍ട്ട് ചെയ്യുവാന്‍ ഈ വേര്‍ഷനില്‍ സാധിക്കും. ലെയറുകളും, ഫോള്‍ഡര്‍ സ്ട്രക്ചറും അതേപടി ഇം‌പോര്‍ട്ട് ചെയ്യപ്പെട്ട ശേഷം ഫ്ലാഷിലും ലഭ്യമാവുന്നു. മറ്റൊരു ശ്രദ്ധേയമായ കാര്യം ഇവ രണ്ടിലേയും ടെക്സ്റ്റ് ലെയറുകള്‍, എഡിറ്റബിള്‍ ടെക്സ്റ്റായോ, പിക്സല്‍ ഇമേജായോ ഫ്ലാഷിലേക്ക് കൊണ്ടുവരുവാന്‍ സാധിക്കുമെന്നതാണ്. ഒരു പി.എസ്.ഡി. ഫയല്‍ ഇം‌പോര്‍ട്ട് ചെയ്യുമ്പോള്‍ ലഭിക്കുന്ന ഡയലോഗ് ബോക്സാണ് താഴെക്കാണുന്നത്. ഇം‌പോര്‍ട്ട് ചെയ്യുമ്പോള്‍ തന്നെ ചില ലെയറുകളിലെ ഓബ്ജക്ടുകള്‍ പുതിയ മൂവി ക്ലിപ്പ് സിംബലായി ലൈബ്രറിയിലേക്ക് ചേര്‍ക്കുവാനും സാധിക്കും.

സൂചന: ചിത്രത്തില്‍ മൌസമര്‍ത്തിയാല്‍ പൂര്‍ണ്ണരൂപം പുതിയ ജാലകത്തില്‍ ദൃശ്യമാവും.

ഇല്ലുസ്ട്രേറ്ററിലാവട്ടെ ഒരു പടി കൂടിക്കടന്ന്, അവിടെ നിന്നു തന്നെ ഓബ്ജക്ടുകള്‍ സിംബലുകളായി സേവ് ചെയ്യുവാനും, അവയ്ക്ക് ഇന്‍സ്റ്റന്‍സ് നെയിം നല്‍കുവാനും സാധിക്കും. ഫോട്ടോഷോപ്പില്‍ ലേ-ഔട്ട് ഡിസൈന്‍ ചെയ്ത്, ഫ്ലാഷ് ഉള്‍ക്കൊള്ളുന്ന വെബ്‌സൈറ്റുകള്‍, മള്‍ട്ടിമീഡിയ സി.ഡി.കള്‍ എന്നിവ നിര്‍മ്മിക്കുന്നവര്‍ക്ക് വളരെ പ്രയോജനപ്പെടുന്ന ഒരു ഓപ്ഷനാണിത്.


നാല്: മെച്ചപ്പെട്ട ഡ്രോയിംഗ് സാധ്യതകള്‍
ഡ്രോയിംഗ് ടൂളുകളില്‍ ലഭ്യമായിരിക്കുന്ന പുതിയ സാധ്യതകളും പ്രയോജനകരം തന്നെ. റെക്ടാംഗിള്‍/ഓവല്‍ പ്രിമിറ്റീവ് ടൂളുകള്‍, റെക്ടാംഗിള്‍ കോര്‍ണര്‍ റേഡിയസ് സെലക്ഷന്‍ ഓപ്ഷന്‍, ഇല്ലുസ്ട്രേറ്ററിലും ഫോട്ടോഷോപ്പിലും ലഭ്യമായ പെന്‍ ടൂള്‍, എന്നിവയൊക്കെയാണ് ഈ വിഭാഗത്തില്‍ എടുത്തു പറയേണ്ട പുതുമകള്‍.


അഞ്ച്: മോഷന്‍ എക്സ്പോര്‍ട്ട്
ഒരേ ആനിമേഷന്‍ തന്നെ ഒന്നിലധികം ഓബ്ജക്ടുകളില്‍ സാധ്യമാക്കണമെന്നു കരുതുക. പഴയ വേര്‍ഷനില്‍ ഓരോന്നിലും പോയി പ്രത്യേകം ആനിമേഷന്‍ ചെയ്യുക എന്നതേ സാധിക്കുമായിരുന്നുള്ളൂ. എന്നാല്‍ ഈ വേര്‍ഷനില്‍, നമുക്ക് മോഷന്‍ ആനിമേഷന്‍ കോപ്പി ചെയ്യുവാനും അത് മറ്റ് ഓബ്ജക്ടുകളില്‍ പേസ്റ്റ് ചെയ്യുവാനും സാധിക്കും. ആവശ്യമെങ്കില്‍ പേസ്റ്റ് മോഷന്‍ സ്പെഷ്യല്‍ എന്ന ഓപ്ഷന്‍ സെലക്ട് ചെയ്ത്, ആനിമേഷനിലെ ചില പ്രോപ്പര്‍ട്ടികള്‍ മാത്രം വ്യത്യാസപ്പെടുത്തി ഉപയോഗിക്കുവാന്‍ സാധിക്കും.

മറ്റൊരു സാധ്യത, മോഷന്‍ തന്നെ ആക്ഷന്‍സ്ക്രിപ്റ്റായി എക്സ്പോര്‍ട്ട് ചെയ്യുവാനും കഴിയുമെന്നതാണ്. പിന്നീട് ഈ ആക്ഷന്‍സ്ക്രിപ്റ്റ് ഇന്‍സ്റ്റന്‍സ് നെയിം മാത്രം വ്യത്യാസപ്പെടുത്തി മറ്റുള്ള ഓബ്ജക്ടുകളിലും പ്രയോഗിക്കുവാന്‍ സാധിക്കും.


ആറ്: മറ്റുള്ളവ
എളുപ്പത്തില്‍ സ്കിന്‍ ചെയ്യാവുന്ന കമ്പൊണെന്റുകള്‍, ഡിവൈസ് സെന്‍‌ട്രല്‍ ഉപയോഗിച്ച് മൊബൈല്‍ ആപ്ലിക്കേഷനുകള്‍ ഡെവലപ് ചെയ്യുവാനുള്ള സൌകര്യം, ഫ്ലാഷ് മൂവി ക്ലിപ്പുകള്‍ ക്വിക്ക് ടൈം മൂവിയായി(ആക്ഷന്‍ സ്ക്രിപ്റ്റ് ഉപയോഗിച്ച് സാധ്യമാക്കുന്ന ആനിമേഷനുകള്‍, മൂവിക്ലിപ്പിനുള്ളിലുള്ള ആനിമേഷനുകള്‍ എന്നിവ സഹിതം) എക്സ്പോര്‍ട്ട് ചെയ്യുവാനുള്ള സൌകര്യം, കൂടുതല്‍ സാധ്യതകള്‍ അടങ്ങിയിരിക്കുന്ന ഫ്ലാഷ് വീഡിയോ ഇം‌പോര്‍ട്ട് ഓപ്ഷന്‍ എന്നിവയൊക്കെയും എടുത്തു പറയേണ്ടവ തന്നെ. പാക്കേജിലെ എല്ലാ സോഫ്റ്റ്‌വെയറുകളും പരസ്പരം കൈകോര്‍ത്ത് പ്രവര്‍ത്തിക്കുന്നതിനാല്‍, സമയവും പ്രയത്നവും ലാഭിക്കുവാനും കഴിയും. മൊത്തത്തില്‍ ഫ്ലാഷ് പ്രൊഫഷണലുകള്‍ക്ക് ഒട്ടേറെ പുതിയ പരീക്ഷണങ്ങള്‍ക്കുള്ള വേദിയൊരുക്കുകയാണ് അഡോബി, ഫ്ലാഷ് സി.എസ്.-3യിലൂടെ.
--


(2007 ജൂലൈ ലക്കം ഇന്‍ഫോകൈരളി കമ്പ്യൂട്ടര്‍ മാഗസീനില്‍ പ്രസിദ്ധീകരിച്ചത്.)

Keywords: Adobe Flash CS3, Introduction, What's New, InfoKairali, Info Kairali, Published, Article, General, Malayalam
--


 
Sankethikam - Technology Blog. Tutorials on Adobe Photoshop, Adobe Flash, Digital Photography and other general technical articles.
Original theme by Douglas Bowman | Theme customized by newnmedia | Lightbox v2.0 by Lokesh Dhakar | Recent Comments Widget by Blogger Templates
Recommended Browsers: Mozilla Firefox / Google Chrome